新手爸媽第一年帶住bb去拜年，面對呢5種親戚，真係唔知點handle啊......
第一類：唔衛生型
啊表姨婆，唔好以為我哋見唔到，啱啱您隻手先摸嚟摸去，而家唔洗吓手就想嚟抱我個b，仲要拎嘢食畀bb食？！咁大個人唔通真係要我叫您去洗手先咩？
第二類：催生型
有啲親戚鐘意講到冇兄弟姊妹好慘......生咗好難湊？以前嗰啲十件八件都咁生喇！咁您都識講係以前喇......提一提都可以笑笑口解釋吓啫，blah blah blah咁講您唔煩我哋都煩喇。
第三類：人比人，比死人型
唔知隔離周太個孫係咪真係六個月就識行喇，而家做bb都要拎嚟比較，幾時比到大？開開心心講吓其他嘢唔得嘅！
第四類：Timing唔啱型
可能嚟拜年見到有bb玩係好興奮，但可唔可以唔好喺媽媽換緊片或者餵緊奶呢啲尷尬時刻開大道門衝入嚟？！
第五類：湊仔專家型
雖然呢種類型多數都係出於好意，但由bb食咩到著幾多衫都要管。仲要為咗凸顯自己有幾專業，批評到媽媽一文不值，實在好傷媽媽自尊。
帶住bb拜年真係比未生前刺激好多架，不過唔緊要，都係一年一次！各位新手爸媽們，記住和氣生財呀！
按呢度睇片。
