2020-01-23

6.6K

給妳8個新年【唔去拜年】嘅理由

諗起過年難得放假仲要應酬,對住成屋三姑六婆,忙前忙後可能仲會有說話聽。真係十萬個唔願意!有時候真係會忍唔住……諗下唔想去拜年可以用咩理由。冇咩頭緒?參考吓小編嘅精選啦!

Top 8
「我要做一個新時代嘅女性,上門拜年太out喇唔啱我。仲有而家老餅先會用Facebook,我用snapchat拜年就得喇!」
完全表現到自己緊貼時事,有個人主見啊!

Top 7
「阿仔/女放完假就好快DSE/呈分試,邊有心情周圍去!收唔到心點算!」
係就係怪獸咗啲,但關乎子女一生前途,斷估都唔會有人敢阻住你喇。

Top 6
「老公……新年我想同爸爸媽媽過呀,你都同自己父母過啦!一年355日都係我湊住小朋友,過年呢幾日我就蝕底啲,畀佢哋跟你啦!」
唔阻止老公同自己父母過年,加晒分喇!仲肯忍痛畀小朋友跟佢,凸顯妳嘅溫柔大方。

Top 5
「最近身體好差,天氣一轉又病咗……老公你帶小朋友去拜年啦,我唔去傳染俾大家喇……咳咳。」
呢一招需要精湛嘅演技、真摰嘅眼神、兩聲咳同一個關心妳嘅老公。成功率都幾高架!

Top 4
「前排我睇咗00姐同So師傅啲書,發現今年同奶奶生肖同生辰八字有啲相沖!見面可能會有血光之災添呀……我好擔心,自己受傷都唔緊要,怕累到老人家咋……」
如果老一輩信呢啲就好辦喇!重點係講到最尾要楚楚可憐咁,激起老公嘅憐愛,咁就萬事OK喇!

Top 3
「養一個小朋友要四百萬……所以我新年都要開工!唔止人工特別高,仲有得逗利是,我係唔會錯過呢個機會!」
見妳咁搏盡為頭家,大家感動都嚟唔切,唔會怪妳冇去拜年嘅!

Top 2
「經歷過SARS之後有啲驚武漢肺炎呀……我咁易病唔去迫巴士喇,小朋友就拜託你喇老公!」
全香港都知新型冠狀病毒感染人數同懷疑個案愈嚟愈多,命仔要緊,冇人會質疑你嘅!

Top 1
「坐緊月,冇得周圍去呀!好可惜拜唔到年……」
恭喜妳!妳有一個100分嘅理由啊,呢個世界冇人可以阻止到你唔去拜年!

 

睇完呢啲屎橋笑吓,係咪好開心呢?各位現實中都係要拜年嘅媽媽,加油!


相關文章

疫症見人心!網民:一個口罩睇清楚好多人

【媽媽心聲】「原來我唔知道自己都有需要。」

【當武漢肺炎遇上農曆新年】自行停課?取消拜年?媽媽的N個抉擇!

在職全職媽媽辛苦了

緊貼武漢肺炎最新相關資訊