2020-01-06

1.1K

駁嘴就係錯?話唔定係腦筋急轉彎!網友:似舊叉燒都係遺傳

講開小朋友駁嘴,確係件令人好激心嘅事,辛辛苦苦、眠乾睡濕咁養大你,仲要頂心杉咁句句駁到衡!若然嗰下真係可以塞返佢入去,可能有唔少阿媽都想咁做!之不過有時候諗返轉頭,其實小朋友人仔細細,點解會識講埋呢啲說話?到底係佢人細鬼大,定有樣學樣?咁就真係要問過各位家長自己先知道!

最近就有JM開壇,討論小朋友令家長最夭心夭肺嘅經典語錄,除咗勾起大家唔少湊仔時候嘅回憶,相信更加係一地心血,睇到都確係唔知好嬲定好笑!

討論區熱話:腰心腰肺駁咀系列

子女夭心夭肺語錄:

1. 我要搭頭等!

家長:你畀心機讀書大個就可以坐飛機頭等倉!
孩子:咁你做乜唔畀心機讀書呀!

2. 浪子不娶

家長:我幫你儲起利是錢,第時娶老婆
孩子:我浪子來的

3. 舉一反三

家長:教極你都唔識...
孩子:你唔識教囉﹐淨係識鬧人...

4. 將心彼己

孩子:媽媽我想買玩具!
家長:你已經有好多,你要知足。
孩子:咁點解你有咁多支香水,但你仲繼續買?

5. 小孩不笨

家長:你呢條錯咗呀!
孩子:覺得我啱喎!
家長:點解你唔聽人講,你呢條真係錯咗!
孩子:阿媽,你點知你真係啱? 你從來都唔會錯咩?

6. 我來請你

孩子:媽,我想請你
家長:請我食飯、睇戲定去旅行?
孩子:想請你安靜!

7. 跌落床?

家長:你瞓覺瞓入啲,陣間你又跌落床呀!
孩子:我唔會跌落床咖!只會跌落地下。

8. 遺傳基因

家長:呢題點解錯咖?
孩子:因為你蠢,所以生到我咁蠢囉。

9. 做好份工

家長:點解你喺學校先會乖?喺學校操行有A-!
孩子:咪好似你返工,要做好自己份工囉!我都唔想。

討論區熱話:腰心腰肺駁咀系列

其實小朋友成長有好多個階段嘅反叛期,除咗成日聽人講嘅青春期,仲有個更可怕嘅時期叫做「Trouble2」!未做家長嘅你,可能覺得Juicy媽太誇張,得嗰兩歲人仔,又識駁啲咩嘴呀?但其實好多時愈細個講嘅嘢先愈夭心,因為喺佢哋角度都只係「講真話」!不過喺激心嘅同時,或者可以換個角度諗,若然小朋友駁嘴嗰陣出口成文,合情合理,總之就係駁到你無聲出,話唔定都係種智慧!所以做家長有時候都要嘗試學習欣賞小朋友嘅腦筋轉數,佢講嘅又未必錯得晒嘅!

【編按:以上內容為作者之個人意見及立場】

相關文章

孝唔孝順7成係天生?網民:先天幾孝順 父母唔識湊孝孝下都心淡

【有得必有失】後悔決定生B做父母? 網民:「你都無問佢想唔想出世啦!」

【疫情下向家人送暖】撰寫溫馨、鼓勵語句,有機會換領「家事研究所」遊戲咭乙份

疫症見人心!網民:一個口罩睇清楚好多人

緊貼新冠肺炎最新相關資訊