Facebook 貼小朋友相就係港媽？ 5大港媽行為特徵　大平反！

開始多人用「港媽」呢個字眼黎形容部分媽媽嘅行為，加上無乜邊個媽媽想被稱呼為「港媽」，呢個字眼好似有啲負面。但其實佢哋部分做法只係關心小朋友成長，又未至於去到過火，所以我哋揀選5大港媽特徵，為佢地進行大平反！

Organic系育兒
成日都將而家嘅育兒方法同以前比較，最常聽到：「我地以前啲細路邊有而家咁矜貴吖！」但同時，以前又邊有咁多黑心食品流入市面吖，媽媽想避免小朋友食到唔健康嘅食品，最好嘅方法唯有用天然材料自己煮，又難怪一班媽媽要主張Organic架！

每月一Cake
「今日係我囝囝53個月大喇！Happy Birthday!」　其實照計每人新曆舊曆夾埋咪最多2個生日，53個月咪即係4歲半！不過都明嘅，每個月都搵個理由錫下小朋友，Keep住切下蛋糕，咪當搵個機會成家人食下飯開心聚會囉！

中堅媽媽group成員
Whatsapp入面有好多個媽媽Group，包括「一同成長！X年X月X日生BB會！」、「2017雞寶寶」，仲有「XX區X歲BB小組」。呢啲group有用嘅資訊有好多，小朋友一樣大，經歷嘅嘢自然都會差不多，媽媽加入呢啲組可以免卻好多搵資訊嘅時間；不過，但同時比較適合夠定力、唔鍾意同其他人比較嘅媽媽加入！

成個FB、IG都係BB相
做人媽媽，幫小朋友影多啲成長片段都好正常，加上一眾Uncle Auntie又唔係成日見到BB，港媽都會好鍾意貼小朋友相喺Facebook、ig等等，等親朋戚友緊貼住小朋友嘅成長紀錄！

經常Facebook Tag老公
「完美老婆計分表！」、「好老公寵老婆十大行為」…其實Tag老公嘅用意都好明顯，就係想你讚下我（如果個分數唔係完美老婆仲點會Tag老公～）！如果Whatsapp send，通常已讀但其實無click入去睇！Tag佢收到notice，通常會望下自己做咩被人Tag咗！

入黎討論區一齊傾