點解年紀越大，腳皮就變得粗糙？其實腳皮嘅形成係同磨擦有關，行路行多咗擦得多，腳皮就會增厚啦。
如果平時無做好保濕嘅功夫，增厚嘅腳皮就會乾燥，有時仲會裂開，影響外觀。適當咁去腳皮，可以幫助腳板變番白滑，著人字拖都無有怕啦。
去腳皮最快嘅方法，就係用剪刀，但係就容易剪到腳皮唔平，有高有低咁，而且如果力度控制得唔好，甚至會整損㗎。
唔想用剪嘅話，可以用打磨皮嘅方法，咁樣做會需時較長，但磨完腳皮就會平滑好多啦。每星期磨一至兩次就夠啦，而且要輕力磨，覺得有痛楚嘅話，就即係太大力或者磨得太多，咁就要收手啦。
近年仲有大熱嘅足膜，利用水楊酸或酵素等，溶解舊皮，一路睇電視做自己嘢，等一陣就可以輕鬆去腳皮，非常方便。
當然就要留意腳皮有破損發炎時就避免用啦，而且都係每星期用一至兩次就夠，以免過份刺激腳皮，無光滑咗不特止，仲造成傷害，甚至係皮膚炎。
去除腳皮仲可以用暖水浸下腳先，令腳皮軟化，容易啲整走，喺而家咁凍嘅天氣，可以令雙腳靚靚又暖笠笠，一舉兩得，你仲唔快啲試下？
