買手袋可以話係唔少女士們嘅嗜好，不過心頭好確係唔易搵，無論款式、大小、顏色、質地、皮料，樣樣都係考慮因素，除咗價錢問題，好似Hermès 呢類大品牌要配到啱心水嘅手袋，真係唔係錢就可以解決到嘅問題！若然真係好鍾意，但努力儲到錢都買唔到，咁唔知自己造又幫唔幫到手呢？
近日就有網友喺facebook群組「淘寶開心Share」上分享自家製手袋組件及製成品，款式似足著名品牌Hermès Lindy系列，吸引網民紛紛討論：「 幾迫真喎！」、「簡直係老公恩物！ 」、「落手整係幾得意，但帶出街就不了！ 」
Hermès Lindy系列主要分為四個尺寸，價格至少由5位數字起標，而中古店二手店Lindy 30同款價格約3萬左右，視乎新舊程度及款式；另外，喺網友分享嘅淘寶店內，仲有其他Hermès經典款式「DIY手工包包材料」，售價由人民幣188元至418元不等，與「正貨」價錢相差約10倍。
雖然有網友表示「自製版」不能與正貨相比，而DIY手工材料包只屬玩味性質，但亦有人認為若然單純享受DIY手袋過程，大可由其他款式入手，沒必要選擇著名品牌款式，即使自製也屬於抄襲行為不應鼓勵。
部份圖片來源： littleandmorevintage@instagram
