唔知你有無試過臉上生咗啲好似飯粒咁細嘅肉芽，又唔痛又唔痕？
原來，呢啲就係傳說中嘅疣。
疣係由「人類乳頭狀病毒」（Human Papilloma Virus）引起嘅皮膚傳染性疾病；疣可以生喺面、頸、手、腳、性器官等唔同地方。除咗影響外觀，患者一般都無其他病徵。
小朋友、長者、免疫系統能力低嘅朋友特別容易感染，而衞生習慣亦好重要，如果按摩、facial 、瑜伽墊等嘅環境地方唔乾淨，就會易受到疣感染。
現時最常用嚟治療疣嘅方法，包括：外用藥物、冷凍治療、電灼、激光治療或手術切除等。
1. 外用藥物
原理：含水楊酸成分嘅外用藥水
療程：約6至12個月
留意事項：避免藥水接觸附近嘅正常皮膚
2. 冷凍治療
原理：用低溫嘅液態氮氣將疣殺死
療程：深層疣可能需要多次療程
留意事項：通常不會有傷口及疤痕，痛楚亦較少
3. 激光治療
原理：用激光熱力消除疣
療程：1至2次
留意事項：精準地將疣除掉，較少傷到附近正常皮膚
4. 手術切割
原理：手術切除
療程：1次
留意事項：手術風險，同埋有機會留有疤痕
治療疣有咁多方法，記得問下醫生意見，選擇最適合嘅方法處理「麻煩疣」啦。
