油性皮膚救星！敏感肌膚不能缺少的維他命B5護膚品

近年成日行護膚品專櫃都會見到各種含有維他命B5成份嘅護膚品，而且價錢絕對唔平，細細一樽已經賣成幾百蚊，咁究竟佢有咩咁巴閉？

其實維他命B5又叫做泛酸，有補濕同消炎嘅作用，可以滲入皮膚表皮層，同時加速皮膚修復，而由於佢嘅性質溫和，唔刺激，除咗適合敏感肌膚使用外，就連光學療程後，比較易發紅同脆弱嘅肌膚都一樣用得；之前因為轉天氣，令我嘅皮膚都出現咗過敏現象，最後都係用咗佢就好番晒，而持續使用仲改善咗膚質，皮膚狀態穩定咗。

另一方面，佢對油性皮膚嚟講更加係救星，好多時油性皮膚都有「外油內乾」嘅問題，肌膚底層乾燥，自然分泌更多面油，令毛孔粗大，仲好容易有暗瘡，而維他命B5吸收力強，質地清爽不油膩，搽完補水之餘唔會太笠。

市面上有好多B5產品，對油性皮膚嚟講，Gel狀B5產品會比較適合，因為佢哋通常都不含油份同礦物油成份，質地會輕爽啲，無咁易塞住毛孔；對乾性膚質嚟講，B5 面霜會較好，因為好多時當中除咗補水既B5之外，仲會有其他成份例如植物油份去鎖住水份，所以會厚身少少，但乾性皮膚用就啱啱好。

B5 產品有平有貴，但貴又唔一定代表好，最緊要睇清楚成分表B5既濃度，如果唔係買成千蚊嘅精華，得果少少B5就好唔抵啦。