服飾穿搭

1.6K

【萬聖節必睇】嘩鬼出動!10款萬聖節親子裝穿搭服裝

踏入10月,意味著萬聖節要嚟喇!雖然話呢個係西方嘅傳統節日,不過近年都有唔少人趁住呢個機會,同朋友們一齊著住萬聖節服裝,出外扮鬼扮馬狂歡一番!其實呢個活動亦並唔係後生仔女嘅專利,今時今日媽媽們都可以同小朋友一齊準備萬聖節服裝,以最搶鏡嘅造型驚喜出巡!

便服系列

講到要為節日做準備,其實都有唔同層次嘅配合,始終唔係人人都願意浪擲金錢喺堆一次性主題服上,一來小朋友下年都未必啱著,而且要打扮嘅話,下年都轉個造型啦!所以如果你想同小朋友應下節,又唔想太浪費,最好就係喺小配飾上著手,再配合一啲可循環組合,咁就襯幾多個造型都無問題啦!

女巫絕對係傳統萬聖節嘅代表人物之一,如果想變身小女巫,其實又唔一定要黑長裙咁死板嘅;好似呢位外籍媽媽就揀選咗紫色同黑色作為搭配重心,再配上一頂代表性嘅女巫高帽,就已經能夠突顯整個形象!
(圖片來源:stephaniehannablog@instagram)

呢一身實而不華嘅搭配,主色相當鮮明,小老虎一家形象更加係顯而易見,不過再睇真啲,其實佢哋全身嘅打扮就只有個耳仔頭箍唔係日常配飾,呢個萬聖節小朋友衣服搭配,可以話係循環再著度極高,一家人一齊著又得,分開著亦得,得咗!
(圖片來源:bodenathome@instagram)

呢套節日感十足嘅裝扮,同老虎家族一樣,看似係為萬聖節特別準備嘅小朋友衣服,但其實都只係日常打扮,不過就揀咗萬聖節嘅代表顏色:橙色同黑色作為主要配色,令整個節日感飆升,而當然整個造型中,臉上嘅妝容重先係重點中嘅重點,如果媽媽係繪畫高手,都可以嘗試下!
(圖片來源:ms.eastwest@instagram)

Baby Shark可以話係紅透兒童界,所以小鯊魚造型就點可以錯過!睇返呢一身萬聖節小朋友服裝可能就要花多少少心思,不過以整個鯊魚家族組合嚟講,其實主要都係以灰色同銀色作為重心,再加上特色鯊魚造型帽,如果小朋友搵唔到整套卡通服,其實都可以模仿大鯊魚嘅搭配模式,咁之後要返著就無難度啦!
(圖片來源:kerrbearxoxo@instagram)

卡通系列

卡通人物係萬聖節其一個熱門模仿對象,好似瑪利奧兄弟、龍珠人物,甚至係美少女戰士,大家都可能有機會見過!至於以一家人作為組合單位,大家或者可以參巧以下萬聖節服裝搭配!

迷你兵團係唔少小朋友嘅至愛,大概係貪佢呱呱叫,唔知講咩又出奇哋啱Key,不過喺萬聖節呢個日子,小朋友點解鍾意已經唔再重要,最重要嘅係佢配色鮮明,而且一身打扮絕對唔難搵,以一條藍色吊帶連身裙又或者牛仔工人褲,配上黃色上身就已經可以達到迷你兵團嘅神髓,如果加埋佢哋個標誌性眼罩就100分啦!
(圖片來源:madisonbontempo@instagram)

經典童話《愛麗絲夢遊仙境》係唔少女孩子從細就愛上嘅故事,當中奇幻嘅情節,天馬行空嘅畫面,令人裡下深刻印象,唔同年紀睇,都有唔同嘅領會,絕對係神級之作,而勇敢嘅愛麗絲亦成為女孩子嘅小偶像,如果可以趁住萬聖節呢個節日,齊齊發揮想像,跳入童話世界入面,同父母化身當中標誌性嘅人物,相信都係一個唔錯嘅選擇!
(圖片來源:lynda.xu@instagram)

驚嚇系列

其實講到萬聖節,佢扮鬼扮馬嘅原意,其實係想以鬼怪造型以作掩飾,等萬聖節出籠嘅惡鬼以為自己係同類,以避過不幸嘅事發生,所以若嫌以上造型太可愛,未能達至「扮鬼」效果,就真係要以鬼怪角色入手喇!

日本驚懼片向來馳名,而當中貞子可以話係無人不識,電影中恐怖嘅配樂,真係令人諗起都打冷震,所以如果要做到效果,呢款貞子造型相信絕對唔會叫你失望,而且仲係一個非常簡單嘅搭配組合添。
(圖片來源:kweilz@instagram)

提到萬聖節驚嚇造型,又點少得骷髏頭呢個不死人物!呢個造型選擇除咗得人驚之外,仲係個極簡易角色,只要畫上一雙又大又黑嘅眼框,已經完成咗8成,絕對係手殘都做到;如果唔想花費喺全身打扮上,仲可以以黑色衫代替,至於頭型更可以不理,瞓醒就可以出動嚇人啦!
(圖片來源:missauritgreen@instagram)

迪士尼系列

睇完啲驚嚇風嘅萬聖節服裝,最後都係介紹返啲靚靚造型大家緩和下雙眼;唔知大家有無留意開,有唔少日系媽媽經常都會為小朋友打扮得美輪美奐咁去迪士尼玩,佢哋嘅心思真係不得了,而且仲近乎將卡通人物神還原,大家如果有時間,都不妨挑戰一下!

有人話小朋友都係自己嘅上世情人,各位爸爸媽媽睇嚟可以趁住萬聖節同小朋友「再續前緣」喇!好似呢位日系媽媽,一身牧羊女嘅打扮確係誠意之作,再加埋小胡迪嘅每項精細配件,呢個組合真係入型入格,相信除咗萬聖節可以大派用場,仲係去迪士尼嘅注目搭配!
(圖片來源:luana.080@instagram)

世界上嘅愛,除咗「情侶裝」之外,其實仲可以有「姊妹裝」同「兄弟裝」嘅選擇;迪士尼人物造型多變,為大家帶來滿瀉嘅發揮空間,當中潛力卡通包括有:《冰雪奇緣》、《正義聯盟》系列電影同《美女與野獸》等等,如果略嫌一式一樣嘅打扮太單調,大家或者可以參巧下呢位日系媽媽,分別以《阿拉丁》入面嘅茉莉公主日常造型同公主造型示人,咁就媽媽同囡囡都一樣咁靚啦!
(圖片來源:elly_hartnet@instagram)

【編按:以上內容為作者之個人意見及立場】

相關文章

【秋冬搭配】日系媽媽教路!盡覽小豆色大熱秋冬親子裝穿搭

【萬聖節必睇】星二代出沒注意!萬聖節驚喜造型搗蛋出籠

【秋冬搭配】3款童裝必備!Chickeeduck 新店限時優惠

緊貼武漢肺炎最新相關資訊