有唔少人都相當鍾意冬天呢個季節，特別係一眾時尚迷，因為除咗可以機會大手掃貨之餘，冬季更散發住搭配嘅節調，比起夏天有更多變化同選擇；而做咗媽媽嘅你，更加可以滿足私心，藉著暖笠笠嘅日子，同寶寶以甜到漏嘅親子裝示人！
單單靠文字去形容，好似都係比較難明，或者大家可以參巧下呢位主理時裝店嘅日本媽媽Eriko，話唔定可以帶畀你無限靈感！
【素色系列】— 素色襯衫法可以話係親子裝嘅入門，單單以同色配搭就已經可以突顯親子裝嘅感覺，就算係唔同剪裁嘅服裝，只要主色系相同，唔難喺衣櫃入面搵到適合各人嘅親子裝。
小貼士：
要留意嘅係同一隻色都有唔同色調之分，就算係黑色都唔可以掉以輕心，因為唔同質料都會令顏色有所變化，所以喺買嘅時候，不防拎起兩件衫對比一下先入手 :)
【一褸即襯】— 如果想既保暖又易襯，可以試下一褸K.O.呢個方法，同樣係以顏色作為襯衫中心，不過今次就要留意返服裝嘅質料同剪裁；如果顏色相同，但一個羽絨，另一個著冷衫，呢個親子裝就省為遜色喇！
小貼士：
要搵到質料同剪裁相近，而且有大細尺寸適合嘅褸，確實唔係簡單事，小編建議大家不妨可以去啲大型休閒服飾店碰碰運氣，童裝部更加係唔少媽媽入手好地方！
【以紋為本】— 略嫌以上選擇太過齋的話，可以嘗試以花紋為襯托核心，譬如：簡單嘅橫間、童心爆炸嘅哈哈笑、可愛嘅碎花，但礙於花紋比較搶眼，所以底色最好選擇素色或沉色系列，咁就靚晒喇。
小貼士：
如果略嫌花紋上身，仲要襯到一模一樣太過誇張？或者可以試下相反/點題搭配，譬如：以小朋友嘅波點衫，反襯波點襪；格仔褲襯格仔連身裙，一樣可以搭配出出色嘅親子裝 :)
圖片來源：Instagram @Blate.eriko
