美妝護膚

1.4K

【用家推介】5款JM心水皇牌眼線筆!XX品牌海嘯都唔甩

有唔少女士們經常被埋怨出門前花上過多時間喺妝容打扮上面,出到街仲要補完又補,要同行者等到花兒也謝了!呢個過程,雖然有時真係令人好納悶,但其實女士們搞咁多嘢,除咗為了靚靚之外,有時出席一啲重要場合都算係一種禮貌!

要由朝靚到晚保住個靚妝,其實都唔係易事,特別係湊住小朋友嘅媽媽們,既想扮靚,但出出入入大汗搭細汗咁,真係咩妝都甩晒啦,仲講咩靚呀!而最易出事位就要數到眼線部份,一個唔小心隨時變成熊貓眼!所以一支有品質嘅眼線筆真係好重要,依家就等我哋嚟搜尋各位JM手袋裡嘅皇牌眼線筆,話唔定可以幫你搵到終極至愛!


Za 柔芯防水眼線筆 (Gel Liner) - $75.00/0.13g

JM分享:海嘯都唔甩@Lana.s

日本美妝品牌Za屬於資生堂旗下,佢推出嘅柔芯防水眼線筆,有邃黑同深棕兩色選擇,柔芯筆咀令繪畫內外眼線嘅時候,唔會帶嚟不適感,而且耐汗、耐油脂,同時耐淚水,有效預防暈染情況出現,保持24小時持久美麗,難怪JM被形容為都話海嘯都唔甩!

Za嘅柔芯防水眼線筆仲有個令大家心心眼嘅優點,就係喺佢嘅成份入面,包含透明質酸同維他命E,貼心修護眼部肌膚,真係點止眼線筆咁簡單!

官方facebook專頁:請按此


Dejavu Cream Pencil 持久貼服霜狀柔滑眼線筆 - 約$98

JM分享:我都有用,有次做嘢做到傻,一嘢捽咗隻眼,捽完之後即刻嚇親,好彩照鏡無事@失憶金魚

可以畫出幼細至 0.65mm眼線嘅 Dejavu Cream Pencil 持久貼服霜狀柔滑眼線筆係唔少JM就至愛,佢採用Loose pigment 配方,加強順滑流暢感;顏色方面分別有自然黑色、深啡色、海軍藍色及淡紫啡色,4色選擇,而厲害之處,當然都係有效對抗油脂、汗水同眼淚,仲有耐摩擦呢個賣點,唔難之得呢位JM話唔小心捽咗眼都甩啦,絕對係有實證結果

官方網站:請按此


CLIO魅黑防水濃烈眼線液筆 - 約$78/0.55ml

JM分享:Clio brush liner,勁油眼都唔甩@得得baby

CLIO魅黑防水濃烈眼線液筆係唯一一位入圍嘅韓國選手,作為品牌嘅皇牌產品之一,基本嘅持久度同防水效果,當然不容置疑,而且其色澤濃黑,對於眼細細一族,可以話係最佳拍檔!

另一方面,佢筆尖纖細易畫嘅特性,對於化妝新手嚟講,可以話係極易上手,如果你係手殘一族,或者可以考慮下佢呀!

官方facebook專頁:請按此


Love Liner防水極細眼線液筆 - $99/0.55ml

JM分享:顏色多選擇,易畫又唔易甩@temilyt

由日本知名彩妝品牌MSH推出嘅Love Liner防水極細眼線液筆來頭絕對唔細 ,佢嘅好用程度為品牌殺出血路,成為COSME用家評價網 21次長年冠軍!

強力防水、防淚、耐皮脂嘅元素,當然唔少得!配合佢0.1mm極細筆尖設計,可以令用家隨心所欲勾畫出粗幼線條,加上其超強速乾特性,可以立即重複描繪都無問題!至於佢嘅獨家特殊聚合物配方,仲可以有效踢走暈染,告別熊貓眼講到錫住肌膚嘅部份,Love Liner成份添加咗5種豐富嘅保濕分子,只需使用溫水,即可卸去妝容,睇嚟佢嘅好處,真係差啲多到數唔晒!

官方網站:請按此


UZU EYE OPENING LINER - 約$120

小編心水:喺芸芸嘅JM推介中,小編有啲咤異竟然無乜人提到MOTE LINER;被稱為係日本必買嘅佢,以「可隨心所欲描繪」嘅概念而誕生,其厲害之處在於製作刷毛嘅用心,由搓揉技術製作,名符其實係「大和匠筆」,加上獨特技術將耐水性提升到200%,品質溫和,成份仲有獨特美容成分,守護眼周肌膚及眼睫毛,真係不得不試!

不過講到試,或者可以先考慮試下由MOTE LINER公司FLOWFUSHI推出嘅全新品牌「UZU」,有MOTE LINER進化版之稱嘅UZU,合共14色之多,當中包括比較冷門嘅白色、橙色、黃色及紫色,相信一樣唔會要你失望!

官方網站:請按此

即上討論區一齊傾

【編按:以上內容為作者之個人意見及立場】

相關文章

【秋冬美甲】棗紅、 奶茶色超顯白!10款2019年大熱指甲樣式推薦

緊貼新冠肺炎最新相關資訊