潔面係護膚嘅第一步，如果做得好，往後所塗搽嘅護膚品就更易吸收，保養效果自然係事半功倍。
有病人問：「醫生，我已經用好勁嘅洗面膏，點解皮膚仲係咁多油同易出暗瘡？」
講到呢個問題，其實可能係因為有好多人都對潔面產品都存有誤解，有啲潔面產品喺使用後，會令皮膚有好乾爽嘅感覺，主要係因為成份上用咗強力嘅SLS等成份，但呢種過強嘅洗淨，反而會令皮膚過乾，皮膚會因為咁以為唔夠滋潤，令佢分泌更多油份，所以會導致有越洗越出油嘅情況出現。
我以前都成日有出油嘅情況，搞到生咗好多黑頭同粉刺，仲有暗瘡添。自從轉咗用含有較溫和成份嘅潔面產品，例如：氨基酸同無皀性嘅潔面乳之後，皮膚就開始穩定落嚟，洗面後，唔會有皮膚鞋十十嘅感覺，反而係滑滑地，咁就係洗得啱啱好。
潔面產品有油狀、乳狀、啫喱、粉狀同膏狀等，而易出油嘅朋友，就要避免太滋潤嘅潔面油同卸粧霜啦。
而潔面次數嚟講，皮膚點油都唔好洗多過2次，用嘅水太熱的話，會過度洗走天然嘅油脂，反而會造成過度清潔，會更加易出油；而用太凍嘅水就容易刺激皮膚，所以用室温或微涼嘅水就可以喇。
