最近新冠肺炎嘅疫情持續，大家都日日戴住口罩，但長期戴口罩，會令皮膚又濕又焗，有唔少人都反映皮膚差咗，好似臉部出油多咗，而且黑頭、粉刺仲現晒形，更有醫護人員因為長期戴住好焗嘅level III 口罩同防護裝備，搞到成臉暗瘡爆發！
如果想避免出現皮膚問題，就要留意以下嘅小貼士啦！
更多文章：【護膚診症室】過度使用酒精搓手液 隨時會變主婦手！？
唔少女士戴口罩都會化妝，但戴口罩長時間會令皮膚變得又濕又焗，加快溶妝情況，混合汗水同面油就好容易阻塞毛孔，更加速粉刺同暗瘡嘅形成！
1. 只化眼妝
其實戴咗口罩之後都遮掩咗下半邊面，要化妝嘅話，可以考慮只化露出嘅眼睛眉毛；如果一定要化全妝嘅話，可以減少使用遮瑕度較高嘅粉底，改用輕身啲嘅粉餅，甚至係蜜粉以作調節膚色。
更多文章：【全面防疫】疫症突襲！增強皮膚免疫力 防菌護膚品全攻略
2. 按時更換口罩
喺少人又空曠嘅地方時，可以除低口罩，俾皮膚透透氣，有指口罩嘅最佳用法係4小時就換一個新嘅，保持衛生之餘，又可以俾皮膚休息，但而家口罩短缺，換口罩就好難做到，所以可以考慮下每隔4小時，就喺衞生嘅地方除一除口罩，避免太焗而令皮膚變差呀！
3. 挑選適合護膚用品
喺選用護膚品方面，都可以用輕身啲嘅配方，例如係乳液狀嘅產品，或係標示不含油份嘅護膚用品，減少皮膚太油而出粒粒嘅機會！
