每年到咗年尾，都會有一大堆聖誕及新年慶祝活動，唔多唔少都會容易令人食多咗、飲多咗同睡少咗；瘋狂過後，必然令大家想來一個大型排毒旅程，好讓自己「重新做人」，兼且順便瘦身。
之不過，成日聽人講「排毒」，其實排毒又係啲乜嘢？
排毒可以簡單分為五大類：
1. 飲食排毒：飲食餐單係坊間最常見嘅排毒方法，而且都係容易自己實行；進行時，切記留意自己嘅身體狀況，切忌嘗試一啲過份激進嘅餐單，要考慮長遠嘅功效，同時個人能否持之以恒。
2. 腸道排毒：一般係靠進食高纖維食品，或者帶輕瀉作用嘅補充品，令大腸得到刺激。進行時，要留意水份嘅流失，因為大量排便好容易會同時流失水份，繼而令到肌膚變得暗啞，到時就得不償失啦！
3. 腳部排毒：一般以中醫角度去理解，毒素係由腳部排出體外，坊間足浴及排毒腳貼都好常見，不過以現今科學嚟講，暫時就未有証據顯示毒素係可以從腳部排走。
4. 氧氣排毒：用85%到95%嘅氧氣嚟提升免疫力，或者減輕頭痛；一般係要由醫生處方，一啲美容院都有提供類似嘅服務，但用之前切記要先向醫生查詢及了解有關風險。
5. 鼻腔排毒：一般用鹽水冲洗鼻腔，較常用於沖洗鼻腔裡面嘅細菌同外來物；醫學証實，鼻腔排毒能有較減低鼻敏感症狀。
其實排毒一般都是事後方法，最重要都係要平時留意日常飲食，以及有適當休息，咁身體保持得好，又哪來排毒嘅需要呢？
