「類固醇副作用好多，唔好用呀！」
「用咗類固醇，你個小朋友就唔識長高㗎喇！」
「搽得多類固醇會有青光眼㗎！」
濕疹患者都知，用咗類固醇就好快好，但又聽得多類固醇有幾可怕，都唔知用唔用好。
類固醇藥膏嘅副作用包括塗部位皮膚會變薄，會生長毛髮，甚至係出現血管擴張，當藥用得好多嘅時候，皮膚更加有機會出現裂紋。
至於，坊間成日講既嘅固醇嚴重副作用，例如：影響小朋友發育或眼睛健康嘅機會，其實好細，因為類固醇藥膏係外用，而唔會呑落肚，以上嘅嚴重副作用係口服嘅類固醇先常見，外搽嘅藥好少吸收入體內，所以唔使太驚搽類固醇藥膏。
搽類固醇時，記住唔係搽得多就快啲好，用量應該係薄薄一層，搽完唔會有白色一撻；用完藥膏後，除非醫生建議，如果唔係都唔好用膠布紗布等包住濕疹部位。
當然，搽類固醇藥膏要跟醫生指示，類固醇藥膏有唔同成份同濃度，醫生會跟據濕疹嘅程度調較用量，所以就算上次用完藥膏好番咗，復發時，都唔好自己到藥房配藥，因為可能適合用另一黎類固醇成份同用量，又可以避免長期用同一款藥膏，出現用到慣就無效嘅情況。
