紅菜頭湯易煲又有益，所以我間中都會煲嚟飲。早前睇肥媽節目，見佢用加左粟米腰豆一齊煲，所以我跟佢煮法試下煲，估唔到個味道又真係唔錯
材料就只需要五樣，紅菜頭2個、粟米1條、洋蔥2個、腰豆少少同陳皮一片。
先將紅菜頭去皮切塊，記得連啲葉同莖都一齊拎埋嚟煲湯呀。
洋蔥切塊。
粟米切段。腰豆浸軟身及陳皮浸透去囊備用。
煲內加入約3L水，然後加入先陳皮
用大火將水煲滾後，將其餘的材料加入煲內用大火煲起
用中小火煲大約1小時
最後因應個人口味，加入適量嘅鹽，就咁可以飲得啦
除左個湯好飲之外，啲煲湯蔬菜都一樣食得，紅菜頭其實都好好食呀
比起之前只用番茄及薑嚟煲紅菜頭，依個明顯就清甜啲啲，雖然冇落任何肉嚟煲，但飲落又好似有少少肉味，可能就係腰豆產生的作用啦！
紅菜頭可以排毒又有益，味道都唔錯，最好就係非常方便，所以都真係建議大家煲嚟飲呀！
