早排係APITA見到有MICKEY矽膠小杯仔，可以整蛋糕、甜品、啫喱……其實我都想買好耐，曾經見過整蛋糕嘅專門店有得賣，不過個質量麻麻地咁。喺其他百貨公司都曾經見到有，不過又無MICKEY款，所以當我見到嗰一刻真係完全唔使考慮，即刻買嚟整畀小小豬，等佢見住MICKEY頭可以食得更開心！
剛好屋企有啫喱，所以就嚟個親子活動，同小小豬一齊整啫喱啦！先倒啫喱粉。
之後就由我嚟放熱水。
小小豬攪溶佢先。
之後落冰粒。
古靈精怪攪攪攪！
完成後，先由我示範一次畀小小豬睇。到第二次就我陪住佢倒落小杯仔度。
之後嗰啲就全程係小小豬自己一手一腳咁做，仲做得非常專心呀！
放入雪櫃啦！
雪咗一晚之後，第二日終於有得食啦！不過點知個模甩得唔係咁好，完全冇晒個MICKEY樣呀！
哈哈哈……唔知係唔係小小豬知道係自己整，佢食得特別開心，特別興奮呀！
之前小小豬係一個無乜耐性嘅仔仔，你叫佢乖乖咁依從你指示去做，都真係有啲困難。尤其當知道嗰啲係食得嘅時候，佢係會仲心急，所以之前真係唔多會同佢一齊整嘢食。
所以當小小豬好成功咁完成整個過程，我亦都有少少感動，同喜出望外。因為依啲小啫喱真係可以話係小小豬親手自己整，基本上除咗落熱水個過程同埋示範咗一次倒落杯仔係我做之外，其他全程都係小小豬自己做，仲要係好專心、留心同埋好溫柔咁去坐定定去做，所以真係唔可以唔俾個叻佢呀！
