生咗和牛B相隔4年，點解我會再有勇氣挑戰生多一個BB呢?
其實我都掙扎咗好耐…
出生於大家庭嘅我，我喺家中排行最細，對上有一個哥哥、兩個家姐。
所以，可以話我自細就係一個小社區長大，同埋有好多人愛錫自己。
但呢一點都唔係令我鼓起最大勇氣，讓和牛B成為家姐，有弟/妹嘅主要原因。
和牛B身邊有好多同齡好朋友，朋友圈嘅朋友都陸續成為哥哥、姐姐。
令佢開始更加渴望，自己都有弟/妹。
所以，和牛B就開始經常同我哋講想要妹妹，想我生個BB俾佢。
佢足足講咗一年，令我產生一種感覺係「唔生一個弟/妹俾佢，會欠佢一世」。
當時嘅和牛B，幾乎每隔一兩日就會同我講「我好想要個BB」、「媽咪，你可唔可以生一個BB俾我」。
然後，你見到佢抱起屋企嘅公仔當BB咁湊，又會覺得…佢真係好想做姐姐。
到我終於成功受孕，和牛B嘅開心、興奮程度。
係遠遠超乎我同牛爸嘅想像之內，佢同我哋講「媽咪，多謝你為咗我生BB」。
而和牛B幾乎每日都會攬住我，錫我個肚。
佢每日都會同BB傾計，每次都會好期待陪我去做產檢。
佢仲不停話我知，佢將所有最好嘅嘢都要俾晒妹妹。
「一個好，兩個好」
其實每個人嘅需要、想法唔同，我期望和牛B可以有弟/妹，想佢感受到手足之情。
成長階段有弟/妹陪伴，對佢喺社交發展技巧上，都會比獨生子女更有優勢。
當然，你可以話資源或者會被分薄。
但到和牛B長大，當我同牛爸都年紀大。
亦可以減低和牛B嘅負擔，唔需要一個人照顧我哋。(當然，可以將我哋送去老人院吧)
而到我哋兩公婆百年歸老，如果和牛B傷心的話，亦有弟/妹可以一齊分憂。
妹妹未出世，已經得到姐姐咁多愛。
好期望，妹妹出世後，兩姊妹真係可以相親相愛呢。
#Photo taken by "Yours Memory Photographs - Kirsten W."
--------------------------------------------------
Facebook專頁：和牛B嘅成長專頁
Instagram：wagyubmami
