2020-11-15

1.8K

【讀者Say】茶記眾生相:你的言行如何 子女言行也必如何

對於父母嚟講,相信喺照顧仔女嘅過程中,周不時都會遇到一啲「兩難」局面,想佢乖乖地坐定定,又怕佢過於文靜變成一舊飯,想佢活潑好動,又怕佢變成亂衝亂撞,尤其是面對幼兒階段嘅小朋友,界乎喺擁有自我思想,但又未識得好好表達自己需求同情緒嘅成長期,確係好難搞、好難控制,期望佢24小晚都懂得「適時」表現出「動靜皆宜」?幾乎係無乜可能,而且小朋友有情緒,父母一樣都有情緒,唔想喺帶仔女外出嘅時候,出現河東獅吼嘅場面,莫非就只可以同仔女留喺屋企?

但話說回頭,「好難控制」又係咪仔女騷擾到其他人嘅理由?最近我哋就收到讀者來函,講到一件發生喺茶餐廳入面嘅激氣事,如果你係以下呢位讀者,遇到呢種事又會點做呢?

「話說有日打算同友人食完下午茶去接BB放學,可能因為時間尚早,餐廳食客不多,被分配到一張四人枱,同旁邊三大一小嘅食客並肩而坐,對方比我哋早嚟一早食完閒聊中,同座小朋友大約4至5歲,無幾耐就開始尖叫大嗌,個阿媽見狀馬上喝罵個女收聲,本身我哋都冇理繼續食嘢,點知個小朋友停咗陣就喺係張凳上玩體操,自轉又公轉,自然反應就望一望我友人個手袋會唔會俾小朋友掃落地。

點知呢位媽媽忽然大聲鬧我做咩睥住佢個女,話我咁望住佢個女會嚇親佢,其實我都唔想理佢哋,只係輕描淡寫咁話:『 你個女咁可愛望下都唔得?』,跟住個阿媽就發狂,不停以粗口指鬧我,猶如小學雞鬧交咁人身攻擊,對住個身邊仲坐住個小朋友嘅阿媽,(我)真係佛都有火:『你都幾冇家教喎,喺個女面前係咁講粗口,你個女咁矜貴唔畀人望得,就鎖返入夾萬唔好出街喇!』 跟住個阿媽就不斷重覆佢嘅粗口,真係咩世界?

其實我冇怪過小朋友,大人眼中所謂嘅『曳』 都係想大人關心注意下,三個大人只顧自己吹水,冇一個理下小朋友,任由小朋友影響到其他人,做阿媽嘅講聲唔好意思有幾難?反而叫人唔好望,有個咁樣嘅阿媽,小朋友以後會變成點?呢一刻,真係覺得身教好重要。」

【編按:以上內容為作者之個人意見及立場】

相關文章

【爸媽心聲】爸媽驚覺小朋友大個仔大個女的瞬間 識駁嘴竟值得開心?

【爸媽心聲】家長嘆養育小朋友開支大 問及為何仍選擇生育引討論

【港識教養】小一女兒精心製作昆蟲標本 日本爸爸分享求Like 結果…

【港識教養】天水圍男童 街市捉活蝦摔地再踩兩腳 街坊:父母呢?

緊貼新冠肺炎最新相關資訊