喺Forum睇到JM呻自己老公有拖延症，做咩事都需要特別長時間，其他人一兩日完成到嘅事，佢夠膽死拖幾個月。就連平時出街，衫都換埋都要「hea」個零兩個鐘先行得。做老婆嘅睇在眼內，真係會覺得好煩，覺得佢好似豬咁懶（呢句我加嘅）！
此帖一出，引起廣大迴響！唔少JM都投訴老公啲嘢唔水浸眼眉都唔肯郁，明明就有充裕時間嘅，或者已準備好只差最後一步，都好意思放埋一邊先，擇日再做。日常生活又係咁，食完飯要攤抖下先肯執碗入廚房，然後又擺返一兩個鐘，等臨瞓甚至第二日先洗。真係好想問，係要擇返個吉日先做得呀？靠你就死緊喇！
重點係，有啲老公自己「拖」字訣，你話佢喇，又覺得你煩。咁隻眼開隻眼閉由佢施施然處理，就短則等返兩星期，長則幾個月咁喇。
好多人話，老婆愈係孭晒啲嘢上身，老公就愈大安旨意等人服侍。其實都正常嘅，自己做女時都會懶懶行，呀媽睇唔過眼咪又係幫手執嘢。不過經營一個家嘅重任又唔可以落晒喺一個人身上，會死人架。如果有啲嘢唔係真係太緊急嘅，咪由得佢拖囉，最緊要最後有完成啫。畀返啲責任同成功感老公，將愛意同鼓勵化為佢嘅動力喇！各位人妻共勉之！
