2021-04-13

2.8K

【理財個案2021】賭博投資輸身家求救!

龔sir,講少少自己背景,我27歲,單身同屋企人住,搵40k,以前要還grant,loan,同大洗,月光族,直到19年我的起心肝儲錢,果年我大約儲左15萬,同年我初初接觸股票,主要買正股,藍籌,加少少潛力股,印象中升到18萬到

我個人比較急進,加上我身邊有朋友買牛熊,如是者,我又開始跟人玩,前排個市好chok,一開波,兩日已賺到唔少,以為好易贏錢。

更多文章:【理財個案2021】31歲,人生的第二個物業

心雄,結果學人玩過夜,結果買錯邊,一開市得番幾萬,我唔鋸,想快d追番,結果去買左d0.01,幾接近回收既牛熊,結果我輸晒所有錢,之後休息左幾日,見個市跌左好多,應該會反彈,因為未到出糧,我忍唔住係信用卡透支左5萬現金出黎再買,結果果日個市再插,我又輸晒,仲差銀行錢;哩2個月,我無再借錢,因為自覺咁樣落去一定死緊,但為左快d,還晒d卡數,我一出糧,就搵機會再買牛熊,雖然無輸晒,但都輸左20-30%,結果拖慢左還錢進度

我好迷惘,覺得自己好失敗,身邊有朋友好保守,佢地都勉強買到500幾萬細細地既樓,而自己雖然事業好順利,有專業資格,黎緊會升到40k,但理財方面就差到極;我好想改變現況,唔想戶口永遠咁少錢,加上我自己都唔細,唔想再咁落去

請問我而家應該點做?

更多文章:【理財個案2021】擁物業車位的財務增值方案

我打算先唔接觸任何投資先,盡快還清卡數,大約兩個月我會還晒,之後我打算cut左個証劵行戶口,遲d用番銀行買正股算,因為証劵行個app,實在太方便,太多資訊睇到,又好多槓桿產品可以玩,自問自己自制能力比較差,一睇又好想玩

之後我想取消左個串流報價佢,一來慳返幾舊水,二來有串流,成日咁貼市,又會手痕,還原基本部,價值投資,根本唔使串流報價;最後,想cut咁d,creditcard,留番一張方便自動轉帳算。呀sir,你有咩建議比到我?我還晒卡數後,之後每月大約儲到28k,應該點運用好?

我希望老師可以救救我,謝謝

個案重點:
‧27歲
‧賭博心態投資
‧利用信用卡投資

重點目標:
‧想改變投資模式
‧怎樣長遠累積財富

更多文章:【理財個案2021】50歲的資產配置計劃!

龔成老師:

唔少投資者,都會經歷短炒、玩衍生工具、賭博等心態,我20年前都試過,衍生工具、孖展等,我都有玩,當時當投資是賭博,想盡快賺錢,心急,心雄。

我明白,呢個世界有些人能憑這些方法賺錢,但只是極少數,我過往做銀行同證券行,好明這點,而長期能賺錢的,大多是長線持有優質股的一群。

其實,好多年輕人都有你這類心態,就算是上過我股票班的學生,我都知總會有同學忍唔住做短炒,但好多野要自己試過,先會死心,我講,你地唔會聽的。

我叫人唔好短炒、玩衍生工具,係因為我20年前試過,明白咁樣無錢賺。其實好多散戶仍抱這樣心態,有人識醒,有人唔識醒。

你暫時停一停,唔好再投資先,呢段時間,你要睇10本有關巴菲特的書,明白點樣先最賺錢,之後先從新開始投資。

同埋,剪去所有的信用卡,之後唔好再借錢投資。

更多文章:【理財個案2021】擁有千萬現金的退休配置

如果你抱有「我想好快賺翻所輸的」,就唔好投資。你要明白,投資是理財的其中一步,這是一個配置過程,你是將現金轉化為資產項,長線持有,到你好肯定自己明白這方法時,先再開始投資。

我地最重要是建立一個長期的「財富組合」,要優質,要平衡,要適合你的年齡與風險承受程度,建立後長期持有,不是買賣賺差價,而是成為你財富組合一部分。

如果你真心想累積財富,就由月供股票開始,以「儲股」的模式進行,不要再炒賣。

若然你有問題想向龔成老師發問,可在龔成的fb專頁中inbox龔成。

【編按:以上內容為作者之個人意見及立場】

相關文章

【理財個案2021】30歲賭徒,求翻身!

【理財個案2021】怎樣克服快速獲利的誘惑?

【理財個案2021】30歲對人生的迷茫

【理財個案2021】40歲自顧人士的乘法投資

緊貼新冠肺炎最新相關資訊