日本「整理諮詢顧問」近藤麻理惠係網絡爆紅，原因係Netflix上映由近藤麻理惠出演嘅真人show《怦然心動的人生整理魔法》。呢位2015年美國《時代》雜誌「年度全球百位最具影響力人物」之一嘅日本人。當然，人紅是非多，對於佢講到當你要決定物件的去留時，要問自己有否「怦然心動」，我就真係唔敢評論，因為對我而言，心動唔係太重要，因為心動往往都經不起時間考驗。例如我朝早見到窮太唔會有「怦然心動」，但係對我而言，窮太對我黎講係呢個世界最重要嘅人一樣，以佢嘅邏輯，我咪要斷捨離窮太？顯然，佢老公同佢結婚至今都好「怦然心動」，真係反而要跟佢老公學下野就真！
沉沒成本
講返正題，雖然我唔係太認同近藤麻理惠呢個執野嘅原則，但係我對斷捨離評格係相當高，我認為一個合理嘅人生係唔同層面上都要做到斷捨離，由執屋，到感情，到投資理財，斷捨離都有助我地處理人生之中唔同嘅沉沒成本（Sunk Cost）。所謂沉沒成本，其實即係已經付出且不可收回嘅成本，例如你用$500買左一隻Game返黎，玩左5分鐘你已經覺得中左伏，咁呢$500就係你嘅沉沒成本。如果你可以立即二手賣返出去，咁當中嘅差價就係沉沒成本（即係沉沒成本減少了）。但係如果你因為覺得咁貴買返黎，唔玩埋佢好似好浪費而捱埋佢，咁呢個沉沒成本除左係$500之外，仲要加埋你要玩爆佢嘅時間值。所以，斷捨離係呢個時間就有效減少你嘅沉沒成本，令你習慣唔好磨爛蓆。
愈窮間屋愈多雜物
我唔講可能大家唔覺，但係我一講，可能大家反應都係：「又好似係喎！」
其實唔係冇道理，因為愈窮嘅人，安全感愈不夠，窮唔單係物質上窮，而係心靈都覺得空虛。好怕要係上手冇得用，所以乜野都覺得有用唔丟得。事實上呢個世界，係極少極少完全冇野嘅野，好似《國產凌凌漆》都講「就算一張廁紙、一條底褲，都有佢本身嘅用處。」，問題係件野，對你黎講，個作用係唔係咁大，你有冇計過留佢係度嘅沉沒成本有幾高？
其實香港先最應該叫近藤麻理惠黎搞搞佢，因為我地嘅居住成本先係最高，我地因為唔做斷捨離而獲得嘅沉沒成本係最多，香港2018年住宅平均呎租係$36.9/呎，一格櫃我當你四呎，一個月就因為你放幾舊冇用嘅野而交緊過百蚊租，然後你同我講二百幾蚊上網費係好貴（你睇多d鏗鏘集你就知我講乜）。
投資上的斷捨離
投資上嘅斷捨離仲簡單，其實就係止蝕。係投資世界，遇然買到幾隻唔生性嘅股票一定有。有冇試過明明年年都下跌(例如利豐 0494)，你都因為買左唔少落去而唔捨得沽貨離場？冇他，因為一埋單計數，就要輸錢，冇人鍾意輸錢，但係你冇諗到，輸錢都未算，輸左咁多年嘅時間同機會，你未必再有機會嬴得返。如果你可以係呢中十年嘅中間離開冇前景嘅股票，單單係買入返盈富基金，回本已經不能同日而語。投資上的沉沒成本，可以以百萬計，影響有幾大，相信都唔需要我多講吧？
向自己的過去說再見
斷捨離玩到最後，當你將你身外物都斷捨離左之後，最後要做嘅，可能就係要為自己嘅過去以及現在做多少斷捨離。過去包括你做過嘅事，認識過嘅人，現在可能就包括你嘅人際網絡，你嘅感情關係等等，有冇d乜野絆倒你，拖住你嘅野，你應該果斷捨棄。佢可以係一個唔值得你再花心力嘅伴侶，又可以係一個次次話得閒約食飯，但係幾年都傾唔到一次計嘅朋友。我係我嘅舊文《極簡主義-窮L快樂的道路》提過，其實設法令自己生活變我簡單，其中一個理由係減少雜亂有助幫你搵到自己嘅目標同方向，而斷捨離就係其中一個手段。所以係呢個FOMO時代，可能減少比增加更重要。另一方面，又唔係一定要唔好嘅野先要斷捨離，有時睇起黎好嘅野，其實都係沉沒成本，其如「名譽」就係。因為你唔係今日先出世，你愈累積得多經驗同名聲，你就愈多包袱，你睇野嘅觀點好可能會愈來愈窄，叔本華話：「阻礙人發現真理的障礙，並非事物虛幻假象，也不是推理的缺陷，而是在之前積累的偏見。」不無道理。
冇人可以完全唔做錯而走完一生，就算幾叻幾成功嘅人，係一生不停累積成就用功積嘅同時，都係不停累積錯誤、偏見同無知。如果唔定期用呢啲人進行斷捨離，我難以想像60歲果陣嘅我，會係幾咁剛愎自用，抱殘守舊嘅廢老。
