2019-01-11

6.9K

淡市下出擊的先決條件

過完年之後,美股同恆指好似瘋狂過山車咁大升大跌,完全係估你唔到,好多人繼續觀望,個市都仍然係好靜,之不過隊長就一點都不靜,雖然無端端病左幾日,但手機裡的代理不停餵盤,係家中研究入市攻略,一點兒都沒閒下來。

淡市下出擊的先決條件,係你要有入市的條件,即係子彈,而好多好多人都係中意升市先狂買呢样果样,尤以股票債卷係2018上半年都係升到飛天之際,好多人都無諗到會黎一個咁長的熊市。當然隊長唔係神,之不過之前都一直係同大家講不買不賣留子彈,呢家可能就算半年一年都唔一定個個話儲多好多,然而如果你手頭上有錢的話,由11月底開始,至到而家,隊長都強調,係入貨時候。

呢段時間其實有票真係好巴閉,當然亦有D唔熟的代理會覺得你係水唔彩你,又或者之前十二月一輪離職潮,有D代理擺明唔想做生意咁款,之後亦真係話比人炒左無做叫我搵第個。然而,大部份的情況係,有票真係巴閉到不得了,大把代理勁積極幫手搵野,而且開價開到好兇都無乜問題,個個都肯試,呢D待遇係市旺時真係唔會有,但呢家代理好多都無乜野做,最多做幾單租已經好叻仔叻女咁,一個唔覺意黎個凱匯出低佣除時倒貼就仲慘,不過唔好講好景果班代理,唔好景的代理同唔好景的業主係每一日都浮現,不過數量唔多,大部份業主都係硬過碌鐵其實,之不過當隊長見到有人肯平10-20%跌件貨出黎,真係唔買唔得。

其實隊長亦好中意四圍勁搵代理幫手,當然合唔合作到就係綠份,因為有D人係懶就係懶,又或者佢地間鋪的盤唔夠靚又係問題,呢個亦係值得深究,因為一手樓就話有價單有透明度,二手市場係,可能有D盤得中原有,有D盤得美聯有,而又有D盤只係得細行有,你唔行晒佢地係唔會知,再者隊長我亦好中意係呢D時候去證明有D野係淡市下係唔一定無可能發生,始終再講多次每個人財務狀態都唔同,等錢洗幾個月出唔到貨,要平賣就係平賣。某一相熟代理,市旺市淡都係話邊口價唔得唔得,咁耐以黎入貨都好難同佢入,而最近佢推介的盤我開一口價比佢又係話唔得唔得,呢頭又想馬住我比機會佢試,果頭就成日想我係market入野唔問價,點知我搵第二間,就係佢個盤隔黎的以低過佢講的價錢10%入市,證明呢個世界係呢一刻黎講,淡市下無話一定唔得,問題只係你肯試定唔試。

身體力行,呢個月買左的有,睇緊的又有,等緊靚價的都有,當然食極都有個蒲,每食一件之後個入貨要求就更嚴格,始終真係買到又有點緊拙了,但係荀野真係跌出黎時好鬼吸引,人棄我取無對手的時光真係幾好玩。回想番舊年年中時試過比人截糊的荀貨,呢一刻諗番都覺得係塞翁失馬,焉知非福,呢家同一口價買的貨真係靚好多。

至於隊長睇緊乜買緊乜,遲D再分曉,但係呢一個跌市時間,當然仲有無得跌真係無人估到,始終特朗普係癲佬,一間又黎搞亂個市場真係吹你不漲,不過如果稍微回暖時,低買高賣就係此時,至少計回報,比起過去一年隊長所講唔好買之時,好多野都開始呈現番比較合適的回報水平,但入唔入野同有無錢入,就好睇你自己的財務狀態了。

【編按:以上內容為作者之個人意見及立場】

相關文章

【理財個案2021】30歲賭徒,求翻身!

理財個案--教師的月供股票計劃

理財個案--目標45歲財務自由!

【理財個案––25歲要攻守兼備】

緊貼新冠肺炎最新相關資訊