2021-03-15

2.1K

【幾個移民媽】5歲入讀美國天才班實錄 港媽:移民讓女兒換個國家繼續玩

我哋年初抵達美國,正值疫情高峰期,全面停課,囡囡就一直處於瘋玩模式。其實都冇咩嘅,以前喺香港讀國際學校,返學放學都係玩。所以呢幾個月,只不過係換個國家繼續玩。

更多文章:【幾個移民媽】港媽放棄傳統名校轉攻國際學校:舊式教學唔對路!

校長來電邀請參與測試

直到8月份,終於開學。大家都知,我一向對囡囡嘅期望就係「最緊要開心」。見到佢返學放學都龍精虎猛,我就心滿意足。點知返咗一個月,就接到校長嘅電話。咩料啊?老師無啦啦搵你,通常冇咩好嘢,更何況係校長。如果你都係父母,應該唔難理解我當時嘅忐忑。

校長女士和藹可親,我隔著電話,都睇到佢四萬咁口。佢話囡囡超級適應,人見人愛,車見車載。我心諗:今次弊啦,抬得越高,就踩得越低,先褒後貶係我哋嘅傳統美德。咁客氣咁熱情,仲唔係準備踩扁我?!點知佢跟住話:覺得囡囡exceptionally bright,好大機會入選「天才班」。所以如果我哋同意,學校會安排一個測試。哦,原來就係咁啫。放下心頭大石嘅我話:要今晚問下囡囡,聽日再覆。同校長嘅對話,竟然咁簡單愉快,睇嚟真係我諗多咗,美國人冇咁複雜。

更多文章:移美港媽放棄筍工轉做全職媽媽:仔女成長只有一次!

更多文章:居美資優媽提倡歐美Risky Play: 人生最大風險就是不敢冒險!

天才班選拔試

晚飯閒話家常,順便提起呢件事,問吓囡囡意見。佢一口應承,仲話好鍾意去校長室玩。於是校長就安排佢,做咗個「天才班」選拔試,叫CogAT (Cognitive Abilities Test)。

呢個測試,主要用嚟了解認知能力。題目分為三大類:包括語言邏輯、數感思維、圖形推理。美國小學第一年,叫Kindergarten,呢班細路通常5到6歲,先啱啱開始學ABC同123。於是試題就採用圖像,而非文字。指令同要求,都由測試員讀出。所以,完全唔需要偷步,提早學認字珠心算,嚟攞高分。呢個測試,唔考默書計數。而係評估思維模式,同邏輯推理,可以話係冇得操冇得呃。

不過好多父母,對「天才班」選拔試有誤解,所以就自創咗備戰訓練。下集再講下呢啲虎媽虎爸。

【編按:以上內容為作者之個人意見及立場】

相關文章

【親子急急問】最理想海外升學年齡係?英國寄宿學校全年學費包食宿只需12萬?

名牌寄宿學校都在廣東道

用半杯水時間 看淡英限制親友當監護人

【升學貼士】海外升學必要指南 教育局提醒學生家長三大重點!

緊貼新冠肺炎最新相關資訊