相信好多家長都曾經為小朋友講大話行為動怒、擔心、甚至震驚，唔敢想像年紀細細就識講大話，究竟邊度學返嚟？其實幼童識講大話，係反映了認知發展上已邁出一步，代表佢哋已經開始懂得運用語言技巧。雖然幾乎係成長必經，但亦唔可以輕視，因為家長對於小朋友講大話嘅反應，絕對會左右佢哋會唔會再次講大話。
更多文章：培育孩子好奇心 激發創作力與想像力
講大話並不代表係壞小孩，家長可以分析小朋友講大話背後兩大原因：
1. 想逃避 ： 呢類小孩情感可能比較敏感，會害怕被比較、被處罰、事情做唔到、被取笑。
2. 有目的：呢類小孩自尊心比較高，會想保護自己、想被稱讚、想大人開心啲、想被肯定、或想引人注意。
當發現小孩講大話時候，有部分家長反應會過激，例如：立即動手體罰、逼問小孩講出真相、即時指責、威脅小朋友唔承認只會下場更慘，種種激動嘅反應會令小朋友擔心被處罰而再次講大話，或者學會推卸責任俾其他人。
更多文章：培育孩子好奇心 激發創作力與想像力
咁家長們對於唔同年齡階段嘅小朋友講大話應該點做？
-2～3歲呢個年齡層嘅小朋友已經識得分大人嘅喜怒哀樂，做錯事後為咗避免麻煩，就會講大話。家長可以好好教育小朋友誠實嘅重要，俾小朋友知道爸爸媽媽鍾意講真話嘅小朋友。
-4～5歲能夠知道自己作出某啲行為，可以令大人有咩反應。例如嘗試扮唔舒服實際係想家長幫佢請假，主要係因為想逃避。家長可以比較嚴肅的語氣咁教導小朋友坦白的重要性。
-6～7 歲呢個歲數講大話係因為想吸引人注意，例如佢哋會想喺朋友面前吹噓自己有好多玩具，想得到認同或注意力。家長唔洗急於拆穿大話，因為會令佢地更無自信，家長可以反問小朋友希望同學鍾意佢定係佢啲玩具，可以提醒小朋友自身價值重要性。
-8～11 歲講大話原因係唔想家長失望，呢個年紀開始知道大人對佢哋嘅期望，想盡力去爭取家長認同，唔想令家長失望而講大話。家長不妨可以同佢哋講成績係其次，品格係父母最重視嘅一環。
家長第一反應及事後的教育相當重要，父母應該以身作則做誠實榜樣，讚賞誠實嘅行為，平日都多多肯定小朋友行為，俾佢哋更安心可以同家長暢所欲言。
小朋友成長過程中，處處都係學問，亦非常考驗父母嘅耐心，各位家長路上要加油呀！
