小朋友由牙牙學語到係地下學爬學走，轉眼間已踏入青春期，開始有自己一套諗法。唔少父母就會開始擔心佢哋行差踏錯，繼而會用「食鹽多過你食米」去說教去溝通。
不過，大家不妨將時間撥返去自己仲細個陣，有無試過爸爸媽咪以為自己鞭策緊我哋，一尾淨係識罰同埋鬧，但往往忽略咗我哋想要被鼓勵嘅心？其實自己子女亦一樣，都想得到尊重！
更多文章：子女虐心的約定：「天堂門口等」 面對生離死別如何灌輸生死教育
熱門討論：功課都可以揀唔做嘅咩？！
冇人天生識得做人爸爸媽媽，其實係家長路上跌跌撞撞，或多或少會係小朋友身上悟出一套方法，孩子同家長其實係一同成長緊。
近日有網民指小朋友讀中一後唔係做功課，無論點勸點鬧都堅決拒做，完全唔聽家長講嘢，搞到頭都痕！其實踏入青春期嘅孩子，會慢慢發展出一套獨立思考，會有自己嘅選擇與觀點，唔多唔少都有我行我素嘅一面，而呢個正正係青春期必經階段。
唔想成日同子女面阻阻，想要理解新世代思維？家長們就要學識以下呢3大相處技巧，去打破因青春期而產生嘅隔膜！
1. 有商有量
子女仲細個陣，家庭內事無大小都由家長決定，亦為子女日常生活定下一啲規矩。當子女踏入青少年時期，佢哋開始慢慢建立獨立喜好、習慣。如果依然活係父母威嚴下，所有事由父母安排、佢哋可能會抑壓咗自己諗法，愈大愈無主見，會嚴重影響到個人社交同工作表現。唔想咁樣？不如開始當子女係半個大人，唔同事情都可以同佢哋有商有量，係溝通期間更可以知道子女對事情嘅睇法，用傾談嘅態度一齊討論點樣做得更好，一齊去訂立目標、一齊去實行。
2. 學會尊重
單單因為子女不聽從自己一套，而大發雷霆， 又或者命令口吻咁去令子女跟隨自己方法，會令佢哋更抗拒；如果只係用自己「年齡大；經驗多」去衡量整件事，只會加深彼此間矛盾，子女亦更抗拒講出感受。
家長們應以子女已成長嘅口吻去溝通，尊重子女已經有獨立思考，唔好一直覺得佢哋仲細唔識諗。係子女表達自己嘅意願後，父母可以耐心咁分享自己個人經驗，俾佢哋去參考，呢啲經驗可以畀佢哋自己衡量利弊得失。同時，家長們亦可以用朋友嘅關係同子女討論，分享自己經驗之餘，聽取佢哋嘅睇法，令子女感受到父母嘅尊重。
3. 細心聆聽
同子女溝通，難免會有火氣衝上頭嘅時候，彼此唇槍舌戰開始嗌交。一味用「我為咗你好」呢個觀點去評量事情，或全盤否定哂子女嘅意見，到頭來有無了解過子女真正諗法？或者知道佢行為嘅背後原因？
不如停落嚟，好好聆聽一下子女嘅真實想法，俾個機會佢哋將自己心入面嘅擔憂表達出嚟。細心咁去聆聽佢哋心情、背後原因或意願，佢哋必然會感受到。長久落嚟，佢哋亦會學識去平心靜氣去表達自己。否則佢哋會覺得「你都唔肯聽，我都唔想講」，繼而不再願意同父母分享。
