【管教最下策】體罰孩子治標不治本 隨時打出禍！

舊日傳統華人社會都有「慈母多敗兒」的講法，擔心對小朋友過份愛錫係縱容。當時教育小孩嘅方式比依家嚴苛得多，小孩只要一犯錯，即會換來責罵與體罰。幸香港體罰文化喺1991年9月起寫下新一頁，由當日起包括學校禁止體罰，香港教育就慢慢開始提倡「愛的教育」。

討論區熱話：仲有冇家長會體罰小朋友？ 

更多文章：從互相尊重起步 訓練孩子自主性 拒做野蠻小霸王

體罰係最不智嘅教育方法，對子女同親子關係只有百害而無一利。體罰當下可能可以即時制止孩子不恰當行為，家長只希望停止孩子當刻錯誤行為就完事，但往往忽略要糾正子女錯誤行為，無視灌輸正確是非觀念嘅機會，令其成長影響深遠。

家長行為 有樣學樣

當小孩受到體罰嘅時候，佢哋會收到一個錯誤嘅訊息：如果想其他人聽自己命令，或想事情如願以償，就學習家長暴力相向嘅方法，喺學校向其他人施以暴力去欺凌其他人，以解決問題。

每一下體罰都破壞親子關係

長期用體罰去教育小朋友，佢哋表面上會表現服從，但對家長嘅信懶同親密度都會同時下降。對家長嘅角色亦會出現質疑，往後有任何挫折或困難，比起向家長尋求幫忙，佢哋更寧願同朋友分享。久而久之，小朋友唔再清楚自己點樣先滿足到父母要求，對父母角色感到恐懼，怕講錯做錯又要受到體罰。隨著踏入青春期，更有可能想嘗試逃脫父母嘅控制，變得反叛甚至乎學會暴力相向。

討論區熱話：仲有冇家長會體罰小朋友？ 

更多文章：從互相尊重起步 訓練孩子自主性 拒做野蠻小霸王

體罰令孩子智商下降

根據美國學者Murray A. Straus嘅研究顯示：長期受到體罰嘅小朋友，大腦嘅前額葉(Prefrontal cortex)皮質量會降低，亦影響咗智商嘅成長， 5 至 9 歲無受過體罰嘅小朋友比受過體罰嘅同輩喺4 年後智商高出 2.8 點。

影響孩子心理健康

好多研究顯示，年幼時受體罰教育係成年人患心理病嘅其中一個成因。若然年輕時父母教育偏向嚴苛，習慣用懲罰或體罰方式教育子女，該名小朋友嘅同理心、社交能力及自主能力發展會比其他人遲緩。而曾經喺青少年時期被體罰嘅成年人，有更大機會患上抑鬱症、焦慮症，以及衍生的酗酒濫藥等心理健康問題。

唔用體罰教育，唔代表會溺愛孩子同慈母多敗兒。當子女犯錯時倒不如循循善誘，適當時候向佢哋解釋正確嘅觀念，可同時制止不當行為外，亦可以避免一時「手快」而為孩子種下一粒壞種子。家長同子女其實係一齊成長，一齊去改善教育方式，一齊建立一個正能量家庭！