2020-05-18

3.5K

【選校攻略】揀幼稚園掀婆媳糾紛 搭5個站返學到底過份唔過份?

婆媳相處本來就存在住好多意見不合嘅地方,生活上,有時都可以忍讓,但係關乎到小朋友嘅決定,大家就會變得好堅持,認為自己嗰套先係最好!老一輩覺得自己「有經驗」,後生嘅就認為「時代唔同」,好似講到幼稚園選校問題,老人家可能覺得小朋友舟車勞頓好辛苦,返幼稚園都係玩,做咩唔讀樓下嗰間?但作為阿媽又覺得教學模式、學校環境通通都係考慮因素,誰是誰非?

最近就有JM喺討論區大吐苦水,話因為選校問題同99出現意見分歧:「我有2個小朋友,屋企同幼稚園相隔5個地鐵站,上午班可能返學會比較迫;車程大約20 分鐘,地鐵站一出就係屋企同幼稚園,係Happy School。我覺得無問題,99覺得我應該轉屋企樓下嘅幼稚園。你哋覺得呢?」

講到呢度,有唔少網友都將焦點放喺「日常係邊個照顧小朋友」之上,仲話「誰湊誰話事」,但其實係咪應該由讀嗰個話事?

「朝早大把家長都坐幾個站送子女返學,完全唔覺有問題/過份。」

「我女讀國際學校,我99 都成日話點解間學校又無功課又無考試話無嘢學,我都廢事解釋,講完都唔會明。 」

「2個小朋友讀要3年,長期早上迫車趕車,其實會辛苦,撞正雨季、勁凍勁熱日子,你哋是但邊個唔舒服,小朋友有時又扭下計,又要有時幫佢哋揹下個書包,都幾累。 」

討論區熱話:你哋覺得幼稚園搭5個站返學過唔過份?

討論區熱話:你哋覺得幼稚園搭5個站返學過唔過份?

提到幼稚園選校問題,鯊魚太絕對係新手,不過過程中,始終覺得「以孩子為本」先係最重要,回想起自己細個,由幼稚園開始就已經要上山下海咁返學,再大啲就搭校車,基本就習慣咗返學=攀山涉水,根本就無諗過返學原來可以近到唔搭車,相反鯊魚佬就係嗰種由細到大可以行返學嘅一群,結論係返學路途又無特別影響呢?似乎又無好大影響。

其實喺面試過程中,多多少少都睇到仔女鍾唔鍾意嗰間學校,真係唔好以為「佢咁細個識啲咩!」,同時作為家長都應該了解心儀學校嘅教學方式、環境適唔適合自己小朋友;至於路程問題,如果小朋友真係日日都話唔想搭車,又或者怕搭車返車,除咗因為佢「覺得遠」,仲有其他可能性,導致佢唔鍾意返學,例如返學過程遇到嘅某啲人同事,可能係同老師唔夾?或者同同學有爭執?每一個細節都係提示,到底讀緊嗰間學校適唔適合你嘅小朋友!

講到尾,一家人出發點都係為小朋友好,各有各道理,與其係咁,倒不如都係由讀嗰個揀!

 

【編按:以上內容為作者之個人意見及立場】