2018-10-26

8.3K

小朋友遲講野?原因其實好簡單,過來人分享小心得! 輕鬆渡過trouble two

圖像中可能有1 人、微笑中、坐下

雷小囡就嚟2歲喇!回顧返呢2年時間過得好快,有時真係好唔捨得佢大得咁快呀⋯⋯


佢都算係身手不凡,牙尖嘴利嘅麻煩b!早行早講野。歲半左右已經有4-5個字簡單句子。20個月左右已經有完整句子簡單溝通。好多朋友問我點解佢講野咁叻,其實唔算好叻,但因為湊過家姐,所以當中可能有少少心得咁啦。



當然每個小朋友發展方向唔同,一世人有一百幾十年要過,早一年半載其實唔算係啲咩。遲早都識嘅野。唔急於一時。唔洗太心急。但早識講野,喺最麻煩嘅 #trouble two 確實係有好嘅幫助。因為可以溝通到,知佢想要咩唔想要咩,都可以教佢有咩可以做,更可以教到佢喊係解決唔到問題。所以我喺最麻煩嘅 #trouble two 過得算比較輕鬆。想同大家分享下我嘅小秘訣,都係果句,係啲好多人都知嘅小心得。只係容易被忽略!



其實我覺得有幾方面對小朋友說話有影響嘅。


Bb話:


唔好同bbbb話。 好多人見bb成日伊伊吖吖,就鐘意用返「bb話」回應佢。好似好親切咁。其實大家有冇諗過佢地點解要講「bb話」?bb只係因為太細,只能發出冇意思嘅聲音。只係大人覺得好可愛所以陪佢講,但其實你同佢講緊嘅時候佢係學習緊,模仿緊你講野。所以最好唔好再同佢地伊伊吖吖,正常說話,咁佢地先學到講野㗎!


圖像中可能有7 人、大家在吃東西和小孩


剛開始加固當然要俾啲易吞易消化嘅野佢地食啦,糊仔、果蓉、粥仔、瓜蓉...之後就魚蓉、肉糊、爛飯、肉碎...當然每個bb嘅情況唔一樣,唔可以一概而論。但而家科技太先進,好多工具可以簡單做出各重食物蓉、仲隔埋渣...但其實咁樣就好易錯過左重要嘅咀嚼訓練。其實醫生都有教,多咀嚼對講野真係好大影響。所以我從來都冇用過什麼研磨機,隔渣器。用最簡單嘅工具去處理食物。最多都只係買左個$38bb碗,個底有粒粒突出,用匙底打圈壓爛啲食物。好多人擔心咁樣會唔會難消化甚至哽親。咁就要睇下你整咩食物啦!其實跟返正常發展食野。睇返食材嘅軟硬度選擇,咁就冇問題啦!最簡單嘅,南瓜切薄片蒸熟,用匙一壓就已經係糊啦,仲洗乜研磨器呢?冇人叫你專登去煮啲硬嘅野㗎嘛!正常跟返階段適合嘅去食就可以喇。


教學:


bb講野唔係要攞住本書!而係要同佢面前面,俾佢望住你。當教佢嘅時候,口形盡量誇大。慢慢講。俾佢望到你嘅口形變化。咁就更加容易學習啦!


鼓勵:bb成日伊伊吖吖唔知講乜都好,我都一定回應佢,等佢知道我聽緊佢講野,佢會好開心。所以我成日自言自語,或者同人傾計時會望住佢,佢會以為我同佢傾計,佢都會好開心㗎!


而且我會盡量估佢想講咩,等佢以為真係自己表達到出嚟,再加以教導。咁佢就會更加鐘意學講野喇!

要多讚美鼓勵,佢講到任何相近嘅字,我都會讚佢叻叻! 咁佢就更加有信心講多D野啦.

切記,千萬唔好對住佢講 :我都唔知你講乜! (我聽過好多媽媽講呢句) 唔好以為佢唔明,佢地估到架! 咁會好唔開心架嘛~ 曾經同朋友分享過呢個方法,佢話囡囡講多左好多野.我都好開心^^


習慣: 


家長好多時都想bb早啲識文三語,成日都一句說話中英夾雜。或者有一個以上照顧者。呢個就係最易令bb混淆喇!


大囡果時識幾個同學仔,23歲都未識簡單句字。睇返佢屋企可謂「八國聯軍」!爸爸講廣東話、嫲嫲講鄉下話、媽媽講國語再夾雜啲簡單英文...你叫個小朋友學得邊樣先?


雖然好似好極端,但而家見好多差唔多嘅情況。周街都見到嘅係:「BB,你要唔要食apple呀?」「你睇下,有car呀!」「banana 係咪甜甜好yummy?」...


當然啦,好多人認為專家話3歲前係學英文嘅重要時刻,點可以唔學咁輸蝕呢?但試問,呢啲唔咸唔淡嘅「英文」你叫阿b點學呀?要教就正正經經咁教。要坐定定攞住教材教。等佢意識到學習時間同日常溝通有分別。


果時我教講野都有時都會有中有英,為嘅唔係佢學英文,而係教一啲佢易發出嘅音。例如15個月左右我會教英文duck duck,又會教下中文雞雞,貓貓..總之教一啲佢會發音容易嘅字,令佢有成功感,咁就鐘意講野啦!教左之後就唔好成日轉嚟轉去。到大左先解釋返中文同英文唔同。

https://www.facebook.com/luiluimamak/videos/273248076649408/

 



而令小朋友遲講野嘅最大原兇就係....


?手機啦!?攞住部手機睇片阿b根本就唔覺得自己有講野嘅需要!而且畫面閃動次數同頻率對bb眼部同腦部發展影響好大。

而且會影響小朋友專注力,令大個比較易出現ADHD或亞氏保加症.都咪話唔驚呀!(曾經經歷過...)

所以我仲堅持到而家仲未俾過雷小囡用手機睇YouTube,就算用手機影完相睇返佢啲片,都只會俾佢睇1-2 ,一分鐘唔夠我就會收埋㗎喇!仲同佢解釋佢係bb唔睇得手機。佢當然間中會偷睇到。但我地全家盡量留意同避免。


聽歌學英文我會用電腦電視甚至係古董vcd機,因為果啲對眼睛傷害冇咁大,而且畫面質素差啲相對閃動頻率冇咁高。對腦部影響少啲。同埋大大個mon,佢地冇咁集中,睇一陣就會走去玩。唔會好似用平板咁睇到實一實。


記住唔好有壓力,最緊要開開心心



#雷囡媽媽 #雷囡媽媽食譜 #雷囡媽媽簡單食譜 



想知多啲我地嘅 #生活小貼士、#簡單食譜、#育兒分享、#吃喝玩樂、#美容,#親子遊、#親子烹飪 ,快啲Like我地啦



Facebook :雷囡媽媽 https://bit.ly/2Nz3xpP


【編按:以上內容為作者之個人意見及立場】

相關文章

愈早加固愈着數?專家解答3大加固疑難

寶寶長大了!6個月大與固體食物的成長所需

抓緊加固好時機!寶寶的飲食變化

【語言發展】兩歲健康院檢查

緊貼新冠肺炎最新相關資訊