2018-04-25

3.1K

【育兒心得】幼兒必經之路。戒片階段。戒片KO!


幼兒到達兩歲嘅時候,父母就會好心急想快啲幫BB戒甩尿片。其實戒片,都係幫BB脫離幼兒時期最重要嘅一環。

坊間有唔少戒片方法,但對於我嚟講其實沒有特定嘅最佳方法,因為每個小朋友發展、性格都唔同,無一種特定方法可以對應到所有小朋友嘅。

無得急,無得迫,唔好令佢對於戒片係一件反感嘅事,我哋只有配合佢哋成長而做好準備。

*成功戒片,就唔洗再去托尿片啦~

 

我哋喺和牛B大概兩歲4個月嘅時候,開始進行在家唔著尿片嘅訓練。日間喺屋企戒片,我諗我哋大概開始咗2-3日,佢就學識咗。

喺戒日片初期,喺屋企日常活動,我哋唔著片,大概每30分鐘問佢或提佢去廁所。

如果唔問/唔提佢哋就會好可能,因為掛住玩而唔記得咗去廁所。

就算而家,我哋都會間唔中提下佢。不過,佢基本上已經懂得自己知道急就會去廁所,除非掛住玩唔記得咗。

而戒片我認為最重要就係提示佢哋去廁所,習慣呢一個模式。

習慣咗之後,佢哋仲會自己拎定紙巾,幫自己清潔。

和牛B而家2歲11個月,俾佢適應咗一段時間唔著片,我哋外出已經可以唔著片,唯獨是午睡及夜晚瞓覺都會著尿片嘅。

其實最初期,佢哋仲未識得分咩係急,通常都會尿濕褲子又或者一地都係尿,都係好正常。家長唯有辛苦少少,洗多幾條褲、拖多幾次地。

但對於每個小朋友,尿濕褲子嘅反應都好唔同,有啲小朋友一啲反應都無,有啲會覺得好驚,有啲就會覺得好污糟好怕。

至於戒片最好係咩時候呢? 我覺得係夏天最好嘅時候,因為冬天著嘅衫褲或會比較多,若然尿濕褲仔,要換褲/ 洗Pat Pat都會怕小朋友凍親以及比較煩嘅。

 

戒片必備:

小童便廁

幼兒初期學習戒片,呢款便廁較為方便幼兒自行去廁所,亦方便清潔。

 

*Aeon嬰兒部購買,大概一百多元。

呢一款亦都非常方便,用完之後可以放返蓋子上去,衛生之餘又方便清潔。

 

小童廁板
這款廁板雖然方便收藏,不過還需要配上腳踏/ 矮櫈才可以配合小朋友自行使用。

 

【總結】

而家去到最後一步,外出戒片階段,我最傷腦筋嘅就係商場未必有兒童廁又或者超長嘅排隊人龍。所以初期戒片,我都會袋一兩塊尿片喺身,當然唔少得多一套衣物啦。

如果成功出街都戒埋片,亦即係話,媽咪終於可以擺設大大個走佬背囊了。


【編按:以上內容為作者之個人意見及立場】

相關文章

【戒片戒到灰】同廁板做朋友都Work!網民親授戒片方法大全!

工作太忙,要登廣告… 請專人教女兒上廁所!

【戒日片篇】我的孩子準備好了!5日與尿片say goodbye

【戒片系列】出門小便器+兒童專用廁所板

緊貼新冠肺炎最新相關資訊