小朋友啱啱蹣跚學步，父母除咗開心之外，都要開始同BB鬥智鬥勇喇！以前一直有人抱或有BB車坐，學會行路之後都唔係好習慣，所以媽媽們要氹佢哋自己行路唔容易啊！最近喺討論區有網民問小朋友已兩歲幾，仲唔肯自己行，引來唔少媽媽現身分享自己嘅經驗喇！
破釜沈舟大法
出門口時唔推BB車，小朋友扭計唔肯行就至多抱一陣，再鼓勵佢行。總之唔好怕麻煩，帶咗車仔就一定會坐架喇！喺抱同行之間無限loop，成功行嘅機率就會變大高架喇～
大個仔大法
平時同BB一齊留意吓其他小朋友，話佢聽「同你一樣咁大個嘅小朋友都會自己行啦喎，你都一定做到架！」當然，佢主動話要行時，無論行得多唔多路，記住要讚佢叻叻豬啊！
驢仔追蘿蔔大法
趁BB仲鐘意痴媽咪，試吓用多啲愛心鼓勵佢。喺BB前兩步話佢知：「加油，行多兩步媽咪就抱你！」媽咪行喺小朋友前面，一路等佢慢慢追，呢個畫面就好似偶像劇一樣唯美！仲可以以前面BB鐘意鐘意嘅Bubu車、好味嘅嘢食等等，吸引佢向前行！
絕不妥協大法
喺可以嘅情況下，如果落到街BB扭抱唔肯行，可以話：「唔行路咁唔好出街，返屋企喇！」又或者小朋友覺得攰扭計唔行，話畀佢知道媽咪都會攰，不如一齊休息吓先再行～總之，就畀BB知道媽咪唔會輕易抱佢喇。當然，講係咁講，BB真係好攰時就唔好勉強喇。
船到橋頭自然直
其實都係嗰句，個個小朋友發展進度都唔一樣。家長唔使太心急，同人比較太多～盡量都唔好鬧小朋友，傷害到佢自尊啊！
即刻入討論區一齊傾：26個月，出街唔肯自己行
