2017-07-05

9.5K

【媽媽必食】滋潤養生糖水:紅棗杞子圓肉鮮奶燉桃膠

20170705_DESSERT

呢排嘅天氣又熱又焗,真係會令人胃口大減。除咗煲多啲清潤嘅湯水之後,其實都可以煲下湯水,都係一個幾唔錯嘅選擇呀。

 

小JM媽就整咗一款嘅滋潤又養生嘅糖水,仲啱晒一家大細食添架。據說功效可以媲美貴價嘅燕窩、花膠,但價錢就極親民,所以又有「平民燕窩」之稱。你又知唔知係咩呢?就係「桃膠」啦!

 

今次小JM就用桃膠整咗——紅棗杞子圓肉鮮奶燉桃膠!

 

咩係桃膠呀?

桃膠顧名思義即是桃樹嘅產物,桃膠係由桃樹天然分泌出來嘅一種淺黃色透明嘅樹脂液,而當桃樹所流出嘅樹脂液當遇到空氣就會凝結成為硬身嘅晶體,就成為咗我地食用嘅桃膠啦。

 

桃膠,可以話係近年興起嘅一種天然食材,因為價錢平功效佳,所以有「平民燕窩」之稱添。

 

桃膠嘅好處

原來桃膠除咗坊間所講滋潤養生外,中醫師亦指出桃膠亦有助補充水份、潤燥,而且對潤腸、通便及尿道尿甚有幫助。桃膠適合大部分體質嘅人仕食用,一星期食一至兩次已經好夠架啦。

 

今次買咗一大樽桃膠返來,可以得閒就慢慢整來食,想幾時食就預早一晚浸定就得。

 

桃膠點樣清洗浸發?

桃膠一般需要浸發大約十至十二小時,以令桃膠發大及變軟身。因桃膠亦會含有雜質,所以必須經多次浸發、過水,及除去黏係表面嘅雜質即可。

 

因為桃膠經浸發之後會脹大,所以千萬唔好一次過發太多,以免造成浪費喔!大約一至兩湯匙已經好夠架啦。

 

取出桃膠之後,就要將桃膠放於水中浸泡約十至十二小時。即係話隔一個晚上就okay啦!第二朝就可以拎出來再清洗,將夾雜住係桃膠嘅雜質除去備用就可以了。

 

紅棗杞子圓肉鮮奶燉桃膠

材料:

桃膠……… 適量(要記得預先發好喔!)
大紅棗…… 六粒
杞子……… 適量
圓肉……… 適量
鮮奶……… 一盒

 

做法:

1. 將紅棗、杞子、圓肉洗淨,紅棗剪開除去核,備用。

 

2. 將鮮奶倒入大碗中。

 

3. 將預先發好嘅桃膠加入至鮮奶中。

 

4. 取適量已洗淨切好嘅紅棗、杞子、圓肉加至碗中。

 

5. 以錫紙包好湯碗,並將湯碗置放於水中燉20-30分鐘。

 

6. 完成後可按個人喜好加入冰糖,即可。

 

夏天天氣咁熱,唔想食熱嘅糖水亦可以將糖水雪凍先食,一樣都係咁美味。

 

因為小JM都有份食,所以媽媽我並無加冰糖。但因為紅棗、圓肉都帶甜,所以味道一樣唔錯喔!

 

製法簡單容易,大家都不妨一試呀!實行過一個健康有益又甜絲絲嘅Summer!

 

【編按:以上內容為作者之個人意見及立場】

相關文章

【劇場分享】 屋企最佳女偽人頒獎典禮

【收納教路】家中隱藏收納空間––櫃門篇

【新冠肺炎】口罩難求! 一文睇晒全港巿面供貨情況(不斷更新)

【放榜攻略】升學出路: 留港修讀基礎課程 一年內升讀知名倫敦大學!

緊貼新冠肺炎最新相關資訊