2017-10-18

3.8K

【有營靚湯】蕃茄薯仔黃豆湯 酸酸甜甜小朋友至愛

早幾日等接放學時,又同啲媽媽齊齊傾傾計,所以我又學識煲一個快靚正嘅有營靚湯,所以即刻去買材料煲俾依個蕃茄薯仔黃豆湯俾骨瘦如柴嘅小小豬飲啦~其實我都知道小小豬係屬於又瘦又矮,不過我嘅定點位係小朋友最緊又冇病冇痛,健康生活就可以,我始終覺得會隨住佢慢慢成長,就會慢慢變成得高大,好似佢舅父咁..哈哈哈。

話雖如此...但啲旁人(尤其唔係成日見嘅家族成員)都唔係咁諗,次次見到小小豬都總係話佢瘦,之後就不停講...講...講...,真係講到我有點......(媽媽們懂得)。小小豬都唔係唔食嘢,我俾佢嘅湯水都應該夠啦,但總係唔明白點解佢唔識肥。

雖然我心態都仍然係貫徹始終,不過當聽到媽媽分享依個營養湯水,佢仲話每兩星期煲三次,KEEP住三個月左右,佢個囡囡真係有啲增長,聽到都真係心思思好想試下呀,心諗就算唔係為增肥,蕃茄、薯仔、黃豆依啲都係好有營養嘅食材,多飲都冇壞(最好就係..唔洗成日諗煲咩湯)。

蕃茄三個、薯仔兩個、黃豆半飯碗及瘦肉$30~

蕃茄洗淨切件~

馬鈴薯去皮切件~

黃豆浸洗一陣~

瘦肉汆水~

煲內放約2L水,然後隨水加入所有材料~

用大火加蓋煲約10分鐘~

然後轉慢火加蓋煲多45分鐘~

最後加入少少鹽就飲得~

蕃茄薯仔湯我都成日煲,不過多數都係用嚟煲紅衫魚,用黃豆煲都係第一次,但其實個味都係差唔多,所以小小豬都鐘意飲。

我自己就鐘意煲黃豆多啲,因為....成個過程都只係一個鐘頭多少少,工序又少啲啲,簡直係快靚正之選,等我都煲多啲先得...哈哈哈!

【編按:以上內容為作者之個人意見及立場】

相關文章

【營養師小貼士】少食多滋味!孕婦進食中秋月餅要注意!

【父母精明眼】3大要點要留神!提防網上課程貨不對辦

【父愛如山】長途貨車司機隻身帶病兒 狠心媽放任不管 結果…

【著數推薦】Pampers X Baby Shark BB展 買滿指定金額送你Pinkfong Baby Shark音樂咪!

緊貼新冠肺炎最新相關資訊