2018-01-22

2.9K

【滋陰清熱】西洋菜鴨腎羅漢果瘦肉湯

一踏入冬天,就可以煲我至鐘意嘅西洋菜湯,唔知點解....真係覺得西洋菜湯真係好好飲,入口嗰一陣少少嘅回甘味,真係好正。當然煲好之後又可以食埋啲湯料,煲過嘅西洋菜真係特別好食呀!

行街市見到好多好靚嘅西洋菜,正好配埋我剛入手嘅靚陳腎,所以就嚟一個滋陰清熱嘅西洋菜鴨腎羅漢果瘦肉湯~

西洋菜除左好好飲之外,其實都好有益。西洋菜性涼,含植物性纖維和多種維他命另外,仲有清熱潤肺、助咽喉炎、氣管炎、肺結核、扁桃腺炎及百日咳等的功效。特別屬於燥熱性的咳嗽,療效更為明顯。(網上資料)

西洋菜一斤、陳腎兩隻、紅蘿蔔一個、羅漢果半個、南北杏一湯匙、蜜棗三粒、果皮一片及瘦肉$30~


西洋菜先用鹽水浸佢一小時,中途最好換兩次水,因為西洋菜係水種植物,一定要洗乾淨啲呀~

陳腎浸至軟身~

羅漢果壓碎蜜棗及南北杏一齊洗淨~

果皮浸軟刮去皮瓤~

紅蘿蔔去皮切塊

瘦肉汆水~

煲內放約3L水,隨水加入果皮~

待水滾後加入所有材料(西洋菜除外)~

等再次滾起後,先可入一半的西洋菜。一定要大滾先好加人西洋菜,如果唔係煲出嚟嘅湯就帶點甘苦味呀~

再次大滾之後,就可以加入餘下的西洋菜~

繼續用大火加蓋煲約30分鐘~

之後轉慢火加蓋煲多1.5小時~

最後加鹽調味,就可以飲得 ~

真係唔係自己讚自己,依個湯真係超級好飲,甘甘地又帶有少少甜,唔止我鐘意,小小豬都話好好飲,不過....佢就唔識欣賞,話啲西洋菜唔好食,真係俾佢激C。

哈哈哈...唔緊要啦,只要佢欣賞飲我啲飲就夠,西洋菜就留返俾我食啦(仲好....冇人同我爭食呀)!

溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!

【編按:以上內容為作者之個人意見及立場】

相關文章

【學生津貼】本學年起$2500學生津貼恆常化 一文睇清申請攻略!

【早產兒小秋彥】秋彥連續四日有尿仔 爸媽:謝謝大家繼續祈禱念經

【秋系換裝】啞緻的NARS柔霧完美粉底液!打造天鵝絨霧面妝感

【內有不良坐姿示範】設計師發明「矯正坐姿椅」 學生單膝下跪上堂?

緊貼新冠肺炎最新相關資訊