自從肥媽節目出街之後，係Facebook都成日見好多朋友仔Post佢哋嘅製成品。我當然唔執輸啦，今日整咗熱門嘅Tiramisu雪糕！
材料係淡忌廉400g、煉奶半罐、咖啡粉兩匙、雲呢拿油少少。
先將淡忌廉放入容器內。
之後打至六成起泡。
加入半罐煉奶。
少許雲呢拿油。
最後加兩匙咖啡粉。
哈哈，我依個咖啡粉都幾有來頭，早係大半年前，小豬媽有朋友去越南旅行，所以就託朋友仔買咗盒貓屎咖啡俾愛好飲咖啡嘅大肥豬。
不過因為整依啲滴漏咖啡都好需要時間，所以一直都擺埋一邊，話有時間就整杯俾大肥豬飲。點知一擺就擺到依家要整雪糕先嚟開，某程度上都覺得自己有丁點兒過分添……哈哈哈！
繼續整埋個雪糕先，將所有材料拌勻~
倒入容器內。
最後放入冰箱雪三小時至硬身就食得啦。
我嘅Tiramisu雪糕完成啦，不過唔知係唔係我打得太多泡泡，所以面頭好多泡泡唔太靚添……
不過睇個雪糕球就知我係成功啦~
無論係個外觀、口感同味道，真係同出面食嘅雪糕無分別呀！
不過我覺得今次比較甜咗啲啲，下次再整時可以將個煉奶分量落少啲啲，咁就應該仲好味呀！
原來整雪糕真係咁容易，相信用同一個做法配合唔同嘅材料，就可以整出唔同味道嘅雪糕。我已經諗定下次試吓用斑蘭整，等我去買啲材料，咁就可以食到斑蘭雪糕啦！(希望我依個想法係成功啦)
