【媽媽愛心勞作】1蚊都唔使嘅紙皮箱恐龍！（內含教學）

曾經就有研究顯示對恐龍有極深興趣嘅小朋友IQ都可能比較高，原因大概係因為恐龍呢個物種，無論種類同結構都極其特別，小朋友可以從了解恐龍嘅過程中，啟發思維發展兼改善專注力！

不過無論IQ高或者低嘅小朋友都係需要放電嘅，最近就喺網上睇到有唔少媽媽製作紙皮恐龍，小朋友著起件恐龍戰衣之後，唔單止開心又興奮，仲好似真係變咗隻恐龍咁通屋走，簡直係放電嘅一大發明！

所以你話我哋仲等咩？趁住兒童節一齊動手做勞作啦！

材料：
— 兩至三個紙皮箱

工具：
— 透明封箱膠紙
— 間尺
— 鎅刀
— 鉸剪
— 黑色箱頭筆（用作繪製恐龍眼晴）
— 漿糊筆

為咗方便製作，所以我決定首先剪好晒需要嘅紙皮部份；

喺製作過程中，若果能夠搵到相同大小嘅紙皮箱，就將會比較方便；另外，因為小朋友要著上身嘅關係，紙箱最好係長方形，而且不宜過大。

恐龍頭部及牙齒

恐龍眼晴、背部甲板 及尾巴

恐龍身驅

準備好晒所需材料同配件，我哋就開始做恐龍喇！

第一步：先做身驅

身驅方面，製作比較簡單，首先鎅走底部，再將上層摺疊部份約以30度角鎅成梯形，由於斜度會影響小朋友穿著後，頭部活動空間，所以不宜太斜。

同時喺兩側梯形部份較前位置，大概預留同鎅出穿手位置，鎅出部份可以留為製作嘅恐龍眼晴，而四邊梯形部份就以封箱膠紙固定。

第二步：加上頭部

將已剪裁好嘅頭部側面以封箱膠紙貼上；溫韾提示，記得弧形部份（即係恐龍個頭顱頂）要向後，同穿手位置方向相反。

貼好兩側之後，就要幫佢個頭顱閂門喇，只要張紙皮微微屈曲，再以封箱膠紙貼上就可以；如果紙皮闊度唔夠，可以用兩塊紙皮先接駁至適合闊度，接駁位置並唔會影響製作效果！

貼好個頭顱頂，仲有個後尾枕，同樣以封箱膠紙貼上即可～

完成頭顱部份之後，其實恐龍雛型已經出晒嚟，我亦即急不及待將啲恐龍甲板同尾部貼上去，但若果嫌佢阻手阻腳，呢個部份可以留喺最後先做；至於貼上恐龍甲板嘅時候，可能會喺頭頂位置遇到彎位問題，只需要輕輕修剪就可以。

而嘴部同牙齒位置，其實都係簡單貼上就可以。

最後用漿糊筆貼埋隻眼就大功告成喇！

講到開工整恐龍嘅最佳時間，就梗係要等定咩瞓咗覺啦，而當佢瞓醒試著嘅時候，我個人都已經坐喺公司，初初仲以為佢著咗上身之後一定會拔足狂奔，誰知收到定咩婆婆傳嚟嘅試著大會片段，定咩嘅反應係驚訝又新奇，仲好斯文（!?）咁慢慢行，所以話小朋友係你永遠都估佢唔到！