2020-02-24

1.3K

單靠在家學習行唔通!全民留班先追得返?網友:學費邊個比?

因應疫情,今年各位學生哥嘅年假真係好漫長,長到作為家長嘅都相當頭痛,最擔心嘅就梗係怕小朋友趕唔上學習進度,而對於學校一連串停課不停學嘅安排,反應可以話係好壞參半,特別係一眾在職父母,即使可以在家工作,都好難分身指導小朋友完成專業教學模式。

至於一眾要交學費嘅家長們,就更加肉赤個荷包,學費、校車費、雜費樣樣要照交,但就要自己教,真係好難平衡心理,就因為呢原因更加掀起一輪N班、幼稚園退學潮;呢頭辛辛苦苦考到名幼,轉頭又話搞退學,老老實實真係玩死家長,有見及此,就有家長提議全民留班!

對於呢個建議,JM們好似都唔太贊成,喺實行方面,更加嚟得有啲不切實際!

「我小朋友要畀學費 ,我唔想畀多一年學費!」

「全港重讀衍生太多複雜問題,不可行!最多cut左個暑假。」

「冇可能,唔通叫夠年齡入讀延遲一年,還是適齡加多幾個老師?仲有邊有位收留!」

討論區熱話:suggest今年全部要重讀?!

討論區熱話:suggest今年全部要重讀?!

Juicy媽覺得,其實目前都只係停課一個月唔夠,若然要全民重讀確實係有啲言之過早,家長其實可以因應自己小朋友嘅情況,同學校商量同研究係咪考慮選擇重讀一年,咁樣點都好過強制性齊齊留班,而有JM亦提到,根據沙士停課同復課嘅情況同安排,當時有唔少學校都會採取縮減暑假,以令學生可以追趕課程,將影響程度減至最低。

至於有家長提到學費、雜費問題,Juicy就真係想講,有時啲嘢都唔可以下下輸打贏要,講到要求學校唔收學費的話,其實係咪有啲強人所難呢,唔通喺呢段時間可以炒晒啲老師、職員,又或者唔出糧咩?調返轉頭,你又可唔可以接受?如果喺咁嘅工作環境返工,老師都幾難有心教你嘅小朋友啦!

其實天災人禍確係無人想,大家最希望嘅都係疫情快啲過,喺呢度時間,或者真係要大愛啲,彼此都多一份互相體諒嘅心啦!

 

【編按:以上內容為作者之個人意見及立場】

相關文章

孩子學習模式大受影響?專家探討學校啟用遙距學習的成效

疫情下的決擇

【在家學習】陳志雲、方健儀等名人「童」你講故事 12集短片講科學天文

應否讓細B重讀一年幼稚園?

緊貼新冠肺炎最新相關資訊