全港首個麥兜音樂劇場「麥兜．出走的魚蛋」將會登陸海洋公園聖誕全城HO HO HO，於2018年12月15日至2019年1月1日期間，獨家上映160場！海洋公園仲趁住聖誕佳節新增咗好多特色環節，非常適合各位嗲哋媽咪同埋囝囝囡囡，一齊感受充滿香港地道色彩同人情味嘅港式聖誕！
「麥兜．出走的魚蛋」音樂劇場
海洋公園今年破天荒同香港原創卡通麥兜合作，帶嚟全港首個麥兜音樂劇場「麥兜．出走的魚蛋」，故事講述魚蛋及一眾食材立志成為美食，卻不幸落入麥太麥兜手中，打算出走嘅食物慢慢發現呢對母子雖然唔識美食，但每日都透過美食傳遞關懷。
小編當日率先試睇，短劇幽默又溫馨嘅情節，配合動畫同埋歌舞，又真係睇得幾開心，重點係麥太麥兜啲無厘頭廣東話配音好有親切感，好睇到「眼眉跳」呀！
麥兜進駐香港老大街
活動期間，麥兜同麥嘜會喺香港老大街舉行「麥兜麥嘜見面會」同大家合照，好想摸佢哋個肚腩呀！
多位懷舊經典人物，如馬姐、女殺手、筷子姊妹花等會喺老大街同大家傾偈互動，個個都好入戲好多嘢講，非常搞笑！
40呎高巨型聖誕樹
噢！聖誕樹托它歸家！～聖誕節又點少得聖誕樹同聖誕老人！呢棵40呎高嘅閃亮互動聖誕樹將LED螢幕以絲帶模式環繞樹身，大家只需將相片上載到Instagram，並加上主題標籤 #opxmas2018，或者用手機或微信掃描QR code上載照片，就可以喺樹上見返自己張相！
上載相片到Instagram仲可以同時參加「聖誕暖心一刻Instagram有獎活動」，有機會贏取由香港快運航空送出價值約港幣8,000至13,000元之雙人來回日本長崎／泰國清萊／越南峴港機票！
「聖誕老人水晶屋」同埋「浪漫飄雪漫步徑」都係必影打卡位！
像真度十足嘅飄雪效果，小朋友一定玩到唔願走！
公園亦安排咗多個合唱團表演「聖誕歡樂頌」，仲有芭蕾舞者造型嘅活雕像表演「芭蕾漫舞雕像」，咪睇個芭蕾舞者好似假人咁，原來佢好似音樂盒入面啲公仔咁，「上夠鍊」之後就會翩翩起舞！
Acapella樂隊嘅演出令人聽出耳油！～～
臨走記得買埋一系列期間限定嘅可愛麥兜主題美食同埋精品呀！
