【親子旅遊】Superstarz Tennis 香港室內小型網球中心

最近去咗咁多戶外活動，今日嚟番一個室內活動避避暑先！
今日去到天后一所室內小型網球中心，
起初我諗一楝商廈，點樣可以喺裡面打網球呀？ 怎知道…

呢度真係可以打網球㗎！
門口一入到去就已經對住一個小型網球場喇。

前面一排大玻璃窗，光線充足，好似喺一個有冷氣既室外場打波咁！
雖然誇張咗少少，
但係呢度所有既裝修都令人感覺好舒服。

教練姐姐已經等咗我哋好耐喇，
要開波啦！

咪住！開波之前梗係要練習一下基本功先，
所有小朋友先聽教練說話坐哂喺彩虹軟墊上面，
首先要睇吓小朋友服唔服從命令先。

教練姐姐吩咐小朋友將手上的網球放到前面放著一個個持球器(個名我作嘅！)
跟住要佢哋去執番個波番嚟！
整體小朋友都好乖，只係有些兩歲都未夠，未可以好好聽到姐姐的指令。

Hysan喺呢度自然成為大哥哥！
跟住教練再拎出一個小型網球拍，
俾BB用的有個網喺度，
呢個活動係要小朋友平衡學習運球。

芊芊因為仲細，所以用嗰塊拍係有個網喺度，
芊芊好厲害呀，佢好成功咁運到個波去對面。
起初我冇諗過佢會咁乖聽教練姐姐既指令！

以為佢一定周圍走唔聽人講嘢，
見到佢做到每一個Task， 都有一刻鐘好感動！

哥哥都做得好好， 一路都被身邊既家長讚！
攪到佢怕怕醜醜一運完個波去對面，
即刻好快咁跑番過去彩虹墊度坐…

練完手仔要到腳仔啦，
教練姐姐拎咗條好似繩梯咁嘅嘢出嚟，
原來係要訓練佢哋腳部的協調。

哥哥完成幾個教練要求做的動作，
跟住教練姐姐要Hysan挑戰難度，
右橫跳三下，再左橫跳一下，
逢進三退一，
Hysan開始亂了，跟唔到啦！
最後跳完好怕醜咁又跑番埋位。

跟住到妹妹又要試吓！

哥哥今次拖埋妹妹一齊做，好"事而V"！

然後下一個環節係雙手接波，
教練姐姐用一個小籃球，
向芊芊碌過去要佢接住跟住投籃。

哥哥就難D，
要彈地拋向Hysan要佢雙手接住，
然後跑去前面投籃！
哥哥接到全場拍手讚佢，有咩法子唔興奮！

坐番喺彩虹墊上面等教練姐姐設定好下一個環節。

之後真係到打波嘅時侯啦，
當然未咁快開始可以對打，
教練先教小朋友如何握拍同埋揮拍，
教練放了許多玩具保齡球樽喺地下，
然後小朋友揮拍將波打向保齡球樽。

芊芊都打得好好，

打完之後佢仲好有手尾走上前執波，

同埋聽教練姐姐話，

將波放番喺開球器上面。

起初教練用一支干釣住個波高低咁移，
模彷網球彈地的情況，
之後小朋友就揮拍將球打出，
見Hysan做得幾好，就今次向住佢掉個波彈地打啦。
估唔到都打得似模似樣喎，
可能平時我同佢打羽毛球打得多。

之後到芊芊啦，
估唔到芊芊都一樣咁叻喎！
見到芊芊聽住教練的指示去做嗰陣，
覺得佢好得意！咁細個都跟得到教練的說話，勁！

其實每個小朋友喺每個環節平均最少都有 2-3 Round 輪流出嚟玩，
所以都唔會因為人多就玩嘅時間少咗，
最後完咗之後教練仲派貼紙送俾小朋友。

教練姐姐教得好好，面對住1-2歲的小朋友都好有耐性，
雖然佢哋亂咁走，成日都聽唔明指示去做，
但係佢都會俾機會佢哋再嚟過同埋幫助佢哋！

雖然短短一個鐘頭，
但係都過得頗充實！

Photo by CANON 5D Mark III， Len | EF 35mm f/1。4L USM

呀劍評分： 9分

呀劍評語： 雖然只係玩咗一個鐘頭，但係我兩個小朋友走咗之後仲好掛住教練姐姐，同想繼續玩，同戶外網球相比，太細嘅小朋友口人如果怕太陽太猛，上嚟呢度玩係最好不過，而且完成咗呢度既課程仲真係會頒番張證書俾小朋友。

Superstarz Tennis 香港室內小型網球中心 簡介

室內小型網球學前訓練班是專為2歲到6歲的小朋友而設。小朋友可以在一個既安全又舒適的環境下訓練專注力，促進肌肉發展， 及學習網球。
我們的教學理念，是透過結合互動教學法和以活動為本。在兩歲到三歲。教練會集中在小組遊戲上。它除了能發展集中力，鍛鍊手眼協調， 訓練大小肌肉外， 又同時為學習網球技巧或其他運動之前， 打好根基， 做好準備。
大概在三到六歲，當小朋友的信心有一定程度時候，教練便會按部就班地教授網球的樂趣及技巧。 我們會使用輕巧的球拍，球速較慢的海棉球，及於面積較小的球場進行。
我們的教練團均擁有豐富經驗和持有合資格專業USPTA & HKTA之教練牌照， 對發掘小孩朋友之潛能，能作出最妥善的安排及照顧。

地址
北角電氣道108號冠貿商業大廈9樓(其實近天后， 龍鳳冰室側)

開放時間
Mon - Sun：9：00 am - 5：00 pm

交通
天后港鐵站A出口，沿電氣道直行至日本城，龍鳳冰室側

網址
http：//www.superstarz.com.hk

電話
2336 0428

電郵
[email protected]