2016-11-22

32.1K

【6個月大BB】加固知多少。起步篇

20161122_FOOD01

不經不覺小JM已經六個月大啦,早一星期返去健康院同私家診所檢查同打六個月針,幸好爸B有時間可以陪小JM一齊去打針,所以今次小JM真係一滴眼淚都無,只係打完輕輕扭左兩下叫左兩下就算,真係好彩有爸B!

 

小JM六個月大,亦意味著我作為「奶媽」已經半年,好開心我可以做到全人奶,亦好多爸B、媽咪及身邊既親友們既支持,令我係呢半年時間成為一個富媽媽。我會繼續努力,將最好的留俾小JM。

 

小JM已經六個月大,而我亦打算由而家4泵轉為3泵,以「夠食」為大前提,唔想再無止境不斷儲太多「儲備」係冰格啦!希望接住落來既日子小JM 加固既進程可以變得越來越理想啦!

 

既然小JM已經夠六個月,咁我亦都開始著手俾小JM試下加固!為咗令加固進程更加順利,我呢位新手媽媽亦要做下功課,了解下有關加固嘅知識!

 

開始加固之前,不如先了解下加固嘅常見問題先啦。

 

1. 小Baby到底幾時先適合開始加固呢?

其實一般係四個月返健康院見姑娘嗰陣,姑娘都會對BB進行初步評估,睇下BB有無需要提早加固。但就一般BB而言,大多數都會係六個月左右先開始加固,當然每個BB發展步伐都會有唔同,所以如果有疑問最好就請教返醫護人員啦!

 

健康院姑娘提議,如果BB有以下表現個陣,就可以嘗試俾BB試下加固架啦:

活動能力及進食嘅反應

.可以依靠椅背坐起

.能夠自行抬起頭

.能夠伸手抓物件

.對食物產生興趣

.會表現出「想食」嘅樣

.睇到匙羹會識張開口

.能夠自行閉嘴吞嚥食物

 

當你發現BB有以上表現個陣,不妨俾佢試下慢慢開始加固啦!但都要切記,唔好因為一時心急而提早加固呀,咁樣會好容易整親小Baby,同比較危險架!要注意呀!

 

2. 點樣開始加固好呢?

a) 時間安排

其實健康院姑娘會建議初次試加固嘅話,最好係BB下一餐奶前嘅30-45分鐘開始俾BB試下食固體食物。點解係「下一餐奶前嘅30-45分鐘」?因為嗰陣BB未係好餓,但又唔會太飽,會比較有耐性去試新野,所以依個係理想嘅「實驗時間」。

 

b) 加固份量

初試加固嘅BB只可以進食少量食物,份量大約一至兩茶匙左右,初時每日只係試食一次就夠架啦,但隨住BB越想越大,越食越叻,咁媽媽就可以慢慢增加份量。初試加固嘅時候,應該以較為幼滑稀身嘅糊仔開始,到BB大個啲先再慢慢轉為較稠嘅食物。

 

3. 加固有咩要注意?

BB 飽/餓嘅反應及注意事項:

加固初期媽媽們要留意一下BB對於食固嘅表現,留意下BB幾時會飽,咁就無咁易Over Feed啦。

 

咁到底BB飽個陣會有咩反應咩?

.越食越唔專心

.避開匙羹

.吐返啲食物出來

.緊緊咁合埋口

.推開食物或匙羹

 

相反,如果BB餓/對食物有興趣嘅話,就會追著匙羹,表示想食;但當BB太過餓嗰陣就會有機會大吵大鬧,甚至乎喊添,所以最好係BB未完全餓嘅時候就俾BB試食固體食物。同時記得要為BB選購一啲合適嘅餐具,方便BB進食,最好就緊係一啲唔易打爛嘅用具啦,最緊要物料夠安全,又無毒,咁就Perfect!

 

當BB飽嘅時記得唔好「強迫」BB繼續進食,以免嚇怕咗BB,令BB對「食野」反感,咁就有機會影響加固嘅步伐架啦!

 

好啦,我講完一大推理論性野之後,又不如睇下小JM加固嘅進程呀!

 

每次小JM見到我拎佢隻碗仔、媽媽奶同糊仔出來就會好hyper,令我都自自然然會好俾心機咁去為小JM準備糊仔。

 

而家小JM試緊Healthy Times嘅Stage 1糊仔

20161122_FOOD02

 

小JM用Kidsme咬咬樂試食車厘子。

20161122_FOOD04

 

小JM閒時最愛Kidsme牙膠。

20161122_FOOD06

 

為食小JM見到人食野就會瘋狂。有晒證據,所以小JM係真正嘅為食豬。

20161122_FOOD05

 

為食豬,你要繼續努力食食食,媽咪會同你一齊努力架!加油呀!

 

相關閱讀:

【育兒】加固進階篇。Finger Food

 

【編按:以上內容為作者之個人意見及立場】

相關文章

BB容易分心?專家教3個貼士提升BB專注力

寶寶長大了!6個月大與固體食物的成長所需

抓緊加固好時機!寶寶的飲食變化

「BB要唔要用包巾?」 包巾好處、壞處、注意事項你要知