2019-07-13

1K

「停一停,諗一諗吖」

話説早幾日放假帶你出去玩,
第一站去餐廳要攞飛排隊等位,
嗰日我地出門口嘅時候其實已經一點幾,
去到餐廳外面已經兩點。

你本身已經肚餓,
然後望住餐廳外面嘅食物相,
你開始抆憎喇。

等枱時間比我預計嘅長咗少少,
知道你真係肚餓,
所以等位嘅時候我都盡量抱吓你氹吓你,
因為講到底,
都係我地遲咗出發所以先會晏食飯。

終於入到餐廳,
食物當然唔會一點就上,
於是你又再抆憎起嚟。

「都入咗嚟餐廳啦仲要扭!?」
「啲嘢食唔駛煮咩大哥?」
「等多陣咪有得食囉!」

呢啲係我心入面嘅VO,
不過我都忍唔住話咗你幾句。

到嘢食終於嚟到,
一天光哂。


之後我諗返,
其實我冇理由去話你,
因為你嘅抆憎冇好過份,
唔係大吵大鬧,
只係抆憎嘅時間比較長。

而重點係,
你嘅要求係食嘢,
點知我帶你入咗餐廳我就要你滿足,
你再表達你嘅聲音,
我反而話你冇禮貌。。

我都冇回應到你嘅訴求,
仲要話你?
核心嘅責任喺我度呢。

雖然我係你爸爸,
不過唔會因為呢個身份,
我就會「啱多啲」或者「冇咁錯」。

就算我假借「教你管理自己情緒」之名,
都唔可以推卸自己嘅責任。

對唔住呀仔。


我承諾,
喺未來仲有唔知幾多年,
我會繼續謙卑聆聽你嘅聲音,
努力做好我嘅工作!

【編按:以上內容為作者之個人意見及立場】

相關文章

【親子活動】「童心同行送平安」親子月捐計劃 不一樣的學習體驗 從小培養孩子善心!

【母親節精選2023】最強精選Shopping好去處 購物優惠合集 送上溫馨心意

【簡易教學】國泰派2.7萬張機票 46個目的地城市任揀!今日起接受登記

【BK送禮】復活節親子好去處 新城市廣場x LuLu豬春日櫻花祭

緊貼新冠肺炎最新相關資訊