2018-03-01

2.6K

【假日好去處】放電公園 + 行山 + 市區BBQ + 親親大自然

喺九龍區有邊到可以一次過滿足到大人(BBQ)同小朋友(放電)嘅願望呢?

就係黃大仙區嘅獅子山公園啦,呢到係行山、BBQ勝地嚟。

講起行山,我未曾真正帶過和牛B去行山,今次可以話係踏出第一步,真正嘅最最最初階入門版。因為要上獅子山公園,首先就係要行上幾百級樓梯,行多條斜路先去去到公園門口。當我企喺樓梯前面,我自己都呆咗,印象中我覺得好容易。但我已經洗濕咗個頭,所以咬緊牙關,衝呀! 上呀!!

最後,和牛B行左2段,之後就堅持唔到,要我抱佢上去…

當我撐落去行完百幾級樓梯之後,望返落去,我心諗我真係傻咗啦~咁都做得到?!

上到獅子山公園,我覺得空氣真係好清新,好多花花草草,好舒服呀!! 而和牛B都好享受呢到嘅環境,仲要用自己部相機影低沿途嘅事物。

獅子山公園仲有長者健體設施、兒童遊樂場設施。

兒童遊樂場設施仲好新淨,好好玩添呀!

除咗上面嘅遊戲組之外,仲有搖搖板,兩婆孫玩得幾開心~

BBQ爐只有26個,BBQ高峰期嘅時候呢到真係要預早上嚟霸爐呀!

跟住婆婆行山去,行上斜路會去到高地食水主配水庫,呢到有片草地。

不過草地比較禿,平時呢到會作為棒發場或其他運動。

親親大自然
呢到鳥語花香,有好多草、好多花,好多綠色植物,真係好舒服!

從而教導和牛B要愛惜保護環境,愛護、欣賞植物及動物。

仲有好多好舒適嘅休憩設施,空間感好夠,好舒服。

攰可以坐坐休息,唔識攰嘅小朋友可以繼續行嚟行去玩。

第一次帶住和牛B行成百級樓梯上獅子山,係我體力一大挑戰,好在都有婆婆陪住同行上去玩。其實個人認為當然係和牛B願意及堅持,自己行晒每級樓梯係最好啦,不過而家體力應付唔到,再大啲係絕對可以做得到! 雖然我好攰,但我都覺得今次好值得上去玩。因為佢親眼認識到獅子山係咩嚟,係邊到,係點嘅樣。

所以讀千本書不如行萬里路係真嘅,親身經歷、體驗過係最深刻嘅。

前往方法:

由九龍塘出發:專線小巴 72或73線

由樂富出發:專線小巴53M線

**進行戶外活動,記謹要帶備足夠嘅防蚊、防曬用品哦。

 

【編按:以上內容為作者之個人意見及立場】

相關文章

【親子好去處】大手牽小手重遊舊地!港島打卡遊@瀑布灣及薄扶林村

【半月板受傷】小朋友學劍擊易傷膝?踢波扭波更需注意

【兒童電影】相隔8年再推新戲 《小馬寶莉:新世代》9月22日登陸大銀幕

【中秋節2021】親子好去處 全港7大中秋打卡熱點推介

緊貼新冠肺炎最新相關資訊