去旅行唔見嘢點算？最近一次旅行，小編就跌咗裝晒身份證、信用卡、回鄉證、提款卡同乜乜物物卡嘅銀包！！！最後經過一番探問，好好彩地搵得返，所以決定同大家分享下呢個難得嘅經歷～
發現唔見嘢時記緊要冷靜，跟住呢個流程去做：
- 搵勻所有袋／酒店角落
第一步當然係地毯式搜索，確保真係唔見咗先作出其他行動。你都唔想搞完一場大龍鳳，回頭才發現其實佢只係喺背囊暗格！加上確認事實後，反而會可以對往後行動有更清晰想法，唔會再喺度十五十六：到底係咪真係唔見咗？定只係我一時搵唔到？ - 計算損失
知道一定係唔知咗，失落嘅心情一定會有。呢個時候不妨估算遺失財物價值，包括補領證件時間／金錢成本有幾高。清楚知道如果最差情況發生（即係搵唔返），自己會蒙受幾多損失，同埋計好條數之後要claim保險都方便啲。好多時個損失都唔係不能承受嘅，打好個底心裡面都會安樂啲！ - 回想最後見到物件嘅時間點
問自己：最後一刻見到佢嗰時係幾時？前前後後有冇走動過／放低過啲嘢／有咩大動作？當自己神探伽理略咁就啱架喇。今次我就諗起最後一次見個銀包，係我著和服時放落手提袋仔。之！後！就毫無拎返出嚟嘅記憶，即係著住嗰時就跌咗喇......
（大家小心玩得太開心，樂極生悲呀～） - 回想遺失物件前到過嘅地方
上網爬文見好多人都話，喺日本漏低嘢好大機會搵得返，所以唔好輕言放棄！鎖定唔見物件嘅時間點後，順住個脈絡去諗：中途去過咩地方，搭過咩交通工具～重點：點與點之間嘅移動過程都好緊要！例如火車、洗手間等地方，回想得愈仔細愈好！下一步就係遂個地方去查探～ - 準備尋找過程所需資料
雖則唔見重要嘢係會好慌張，但人急起上嚟往往就會交代得唔清楚。加上言語不通（日本人的英語你懂的，仲要警察多數係叔叔輩），咁仲更加講唔清喇。因我係一支公去處理，事前就搵咗識日文嘅朋友翻譯定以下句子：
朋友都不負眾望地及時伸出援助之手：
記住：交代自己身份、此行目的、同埋唔見前嘅線索（後尾諗諗下發現講埋物件特徵都得，反正都一定會問）當然報失過程都需要作出交流，但起碼對方已知道你需要啲乜。有咗呢張圖，我嘅報失之路可謂暢通無阻～ - 到各個地方詢問
基本上當日我留過腳毛嘅地方，都問咗一次。首先係租和服嘅地方、Shopping Mall、再到警署。結果都係冇～然後睇到有過來人話係JR車站成功搵到失物，咁我又去試下。基本上你有心留意的話，Lost and Found的辦事處都好顯眼的。順手畀個官網大家參考下：點擊此處。
去到JR 上野站Lost and Found辦事處一問之下，竟然！我搭嘅唔係JR，喺職員指示之下落返去樓下地下鐵（可恨的日本交通網絡）......一落到去我係搵唔到Lost and Found的，問咗個旅客Information Counter，佢就教我點去喇～好啦，今次真係搵到（太勞累所以興奮得有啲無力）！佢仲畀埋車票我搭去好心人放低我銀包嘅某個站拎。所以終於！！！銀包bb返嚟我懷抱啦～
- 報失以claim保險
記住要有報失紙先可以claim保險～當時諗住應該搵唔返，所以走去報失，之後先諗起去車站問，所以順序有啲唔同。咁我就去咗最近目標地段嘅上野警察局，佢都相對大間啲，警察都勉強講到幾句英文。
填完Form～（記得講明你需要報失證明）寫低個人資料，遺失物品嘅特徵同價值等。之後警察就會搵下有冇，好彩的話就會已經被交到呢個警察局，唔好彩的話，都會獲得報失紙如下：
最差情況都係返香港Claim保險啫，下次小心啲就OK喇，唔使太自責！
