去冒險樂園都唔一定係得個玩"字"，原來依家都仲可以學到嘢，可以學做一個都市小農夫，落手落腳由播種開始，了解水種植體驗，之後又可以自家設計盆景，好豐富嘅活動
坦白講，當我收到冒險樂園邀請時，我都有一個玩玩下嘅心態，可能冒險樂園玩樂形像太深入民心了。不過一嚟到，睇到一切佈置，加埋導師姐姐嘅講解，我嘅想法就開始改變，原來"都市小農夫"係一個好認真嘅活動嚟呀！
由於我地需要進入一個24小時監控環境去體驗科技水耕種植，所以所有進入種植室嘅大小朋友都要穿上鞋套，著好一身裝備先可以入去呀~最後就係要經過無塵室吹走身上灰塵，先可以正式入去種植室，所以話真係好認真照顧種植室嘅各大小植物~
當然各位小朋友就要先乖乖聽姐姐講解，學做一個稱職小農夫。其實整個課程原本係分三節，不過因為我地今日係體驗活動，所以就濃縮左啲課程(雖然係濃縮左，不過小小豬所體驗嘅都係一樣呀)~
第一個所學到嘅就係利用顯微鏡觀察不同植物特徵，導師姐姐會利用簡單嘅問題方式，等小朋友可以從遊戲中學習植物知識~ 小小豬都係第一次接觸顯微鏡，佢感覺都係好新奇，不停拎啲植物標本嚟睇
係依個時候，各位小朋友就跟住導師姐姐去參觀種植室，了解水種植嘅原理
之後我地就去整DIY盆景。有好多唔同嘅佈置同植物，真係花多眼亂唔識揀添
小小豬就揀好所需要嘅材料之後，店員姊姊好有耐性咁慢慢教佢點樣設計自己嘅盆景~
都整得幾靚，好有聖誕氣氛呢~
唔止小小豬，我地兩個都覺得依個活動又真係唔錯，既可以教小朋友種植技巧，等佢地了解多啲植物嘅特性，又可以培養佢地愛護同照顧植物，所以話都幾有意義。再加上價錢又唔貴，整個課程共三堂，都只三百蚊.....抵玩啦！
