2019-05-09

427

【海邊執垃圾?】做個環保小幫手

早前我地去左元洲仔自然環境保護研究中心參加WWF夏日學堂活動,之後小小豬就嚟左一個餘興節目,就係去海邊執垃圾~

事緣小小豬係上次海洋公園親親動物活動中,聽各位哥哥姐姐分享依家海洋環境破壞情況,知道海灘如果有好多垃圾嘅話,就會影響生態環境。就好似水母會誤食垃圾導致死亡,所以就提意不如下次去沙灘或者海灘玩時,都抽少少時間去幫手執走少少垃圾,咁就可以保護為生態環境啦~

一聽到話想去執垃圾,初時我都真係有點……….,不過諗深一層,既然佢有依個心意,再加上又係主動要求,都係一件值得支持嘅事(難得佢唔怕污穢),所以我都買定小朋友勞工手套,等佢可以做個環保小幫手~


當佢知道今日嚟元州仔時,就千叮萬囑我一定要帶埋小手套,等活動完左就可以去海邊執垃圾~



始終都係第一次,所以係開始之前都係叫小小豬今次只係執啲大件垃圾,等佢適應下先(其實...係我要適應,作為媽咪既....唔多唔少都有丁點擔心呀....媽媽們懂的)~



初時我都以為小小豬係玩玩下,不過原來佢都好認真,邊行邊留心睇,都執左好幾個膠樽..發泡膠....。如果唔係因為開始落雨,我諗隻豬仔都仲繼續係度搵膠樽~




不過我就有點失敗,掛住帶小手套,竟然忘記帶垃圾膠袋,為左唔想小小豬失望,所以我就犧牲左個靚靚環保袋。

但小小豬竟然話「咁仲好啦….我地將啲垃圾放入垃圾桶之後,洗返乾淨環保袋之後又可以再拎嚟執垃圾,咁又可以慳返個垃圾膠袋啦」 。

OMG…..阿仔….洗嗰個係我哦,可唔可以理下我感受呢。不過,小小豬有依個自發性,做媽媽嘅係要行動上支持,所以...唯有....頂硬上啦.....唉~

大家放心...小小豬做完佢工作之後,我都有幫佢徹底消毒,所以都係一件安全嘅事嚟嘅!

好明顯佢係完全係意猶未盡,佢仲話希望下星期天氣會好,咁就可以去沙灘再執好多...好多....好多垃圾,咁啲海邊棲息嘅小動物就唔會受到影響啦!

依隻真係大個仔,識得去實踐學過嘅理論,亦可以將自己想做嘅嘢做好,諗啲嘢都係完全我想像唔到,所以話呢...有時我地大人真係要學懂放手,如果唔係就睇唔到小朋友長大嘅一面!

【編按:以上內容為作者之個人意見及立場】

相關文章

【2023新春好去處】不斷更新!全港商場新春佈置打卡熱點合集 一齊開心迎兔年!

【親子好去處】D•PARK陪你過新春兔年 白紙市集首次登陸D•PARK

【親子好去處】免費遊戲室!黃大仙區再生能源主題兒童遊戲室

【BK送禮】祈願「瀛」新春!送綠意迎春利是套裝及飯盒套裝

緊貼新冠肺炎最新相關資訊