2018-11-11
1.9K
【澳門親子遊】澳門大熊貓館2018**如同迷你海洋公園 x 放電公園
上年其實曾經同大家分享過一次澳門大熊貓館，不過當時係落雨天，周圍都濕笠笠。我哋就只有參觀咗大熊貓館、小熊貓館同埋其他嘅小動物。
隔一年我哋再次到訪「石排灣郊野公園」大熊貓館，正值好天氣。時間大概11時半左右，太陽都開始猛烈，幸好有少少風啦。對鍾意動物嘅和牛B嚟講，呢個景點絕對係必到嘅。
呢到亦有一種迷你海洋公園睇動物嘅感覺，當然只限睇動物部份啦~如果唔參觀大熊貓館嘅話，就唔需要額外俾入場費。免費區有小熊貓館、猴子籠、小湖有天鵝、火烈鳥等。
若參觀大熊貓館嘅話，可到精品店購買入場券。13歲或以上(包括成人)$10/位一小時。
打算去參觀嘅話，亦要留意下午1時至2時會休館呢。
購票時，就算小朋友係12歲或以下都要通知職員哦~
呢個湖有黑、白天鵝。另一邊仲有火烈鳥、鴨等。
其他免費動物區，有多個品種嘅猴子類動物。
有松鼠猴，身手超級敏捷!!!
呢到都有和牛B好鍾意嘅「金金」川金絲猴，藍色面嘅猴子。
和牛B睇得超開心呀~
珍稀動物館，入面住咗小熊貓~
買齊入場券，依照參觀時間就可以馬上去參觀了。入場記得將飛交俾職員，佢會撕走飛尾。
格局好似香港海洋公園嘅大熊貓舊館，但就光猛好多嘅。
懶洋洋嘅大熊貓
正在努力食竹葉嘅大熊貓
入場後，記得要遵守場內嘅規則，不要喧嘩、影相唔好用閃光燈、拍玻璃等。
陽光充足嘅大熊貓館，仲有好涼快嘅冷氣。
大熊貓館外有唔少影相嘅靚位~
兒童遊樂設施
設施方面，遊戲組分成兩個，此區比較適合幼兒玩樂。
攀爬設施
仲有氹氹轉
滑梯組
另一個區適合5歲或以上小童玩樂，以攀爬、繩網遊戲為主。可以鍛練力量與膽量。
和牛B只係爬咗呢一節就唔敢玩了~唔緊要啦，再大啲一定玩得到~
經典跳飛機遊戲
鐵皮火車
火車係唔會郁嘅，但係小朋友扮揸火車依然係玩得好開心。
飛機模型
迷你大三巴
園區地圖
仲有免費嘅工作坊玩，不過官方網站無相關資料顯示。所以要去到現場先至知道活動時間表呢。
精品店
大熊貓、小熊貓及其他動物嘅紀念品。
小食亭
玩咗一陣，太陽實在太曬啦，去小食亭食少少嘢休息一陣就離開了。
【注意事項】
進行戶外活動，記得預先搽好防曬霜，戴闊邊帽。
亦做好防蚊措施，定時飲水補充水份。
亦避免長時間曝曬，要搵地方避太陽呀。
【澳門大熊貓館@路環】
熊貓館開放時間：
10am - 5pm (**最後入場時間4:45pm)
門票：熊貓館購票成人每節$10/1小時，小童12歲或以下及長者65歲或以上免費
地址：路環石排灣馬路，石排灣郊野公園
http://www.macaupanda.org.mo/
澳門巴士網：http://www.dsat.gov.mo/bus/site/index.aspx
--------------------------------------------------
