「Homeland」，我們的「家園」，即係香港。
Homeland=Home + Land，「Homeland」亦代表香港係一個載滿咗無數家庭嘅小島，喺呢個小島上，每位都努力尋找屬於自己家庭嘅幸福。面對近年社會發展﹑家庭結構轉型﹑疫情﹑社會變化等等嘅轉變，我哋可以點樣喺呢個小島尋找「轉變中的家庭幸福」？
作為「家福月」嘅重頭戲，由香港家庭福利會（家福會）主辦，聯乘白紙市集嘅「Homeland」家庭市集將於今個月21及22號同大家見面啦！今次搵嚟網絡人氣插畫師Oh...little sweet作大會設計，又以「轉變中的家庭幸福」為主題畫出一系列令人聯想到家庭幸福嘅作品，靠住充滿家庭歡樂嘅設計同埋六大場區嘅活動內容，希望大家嚟到呢個市集都會感受到暖暖嘅幸福感。我哋嘅「家福月」大使岑珈其都會喺5月21號同大家見面，喺中午12點半嘅開幕禮分享維持家庭幸福嘅心得同埋做一陣店主㗎！
購物x遊玩x教育 一次過滿足晒一家大細嘅Family Day活動
「Homeland」家庭市集為大家帶嚟超過80個「家庭友善」嘅本地品牌，除咗唔少品牌嘅背景或者產品都同「家庭」有關，仲聯乘5個檔主推出「Homeland」限定嘅點題産品。另外，大會準備咗不同類型嘅免費家庭及個人手作工作坊（需預約，有少量現場報名名額）、插畫師Oh...little sweet嘅作品展覽、小童活動區等豐富內容，仲有千祈唔好錯過位於二樓The QUBE 嘅「古典相機即影即有」留影區，同埋每日限定嘅現場音樂表演，表演單位包括Fuk Fu福富、ELKA(鄭芷淇)、樂隊COPAK同埋呀妹(黃敏蕎)，等大家喺熱鬧嘅氣氛之下同屋企人留低快樂回憶！
趁住疫情好返啲，把握機會同屋企人或者朋友去行下市集，放鬆下啦！
以「家庭」作為靈感嘅點題產品，令你更有家嘅感覺
自由定價，同你最愛嘅人影張靚相，好好記住依一刻，留住溫度
另外大家入場嘅時候就會收到印章地圖，記得行晒全個市集，儲齊印章就可以去接待處換領豐富禮物啦！大會仲安排咗遊戲攤位同埋扭蛋機俾大家一齊搵返童心，分別可以拎到唔同嘅小禮物同埋市集優惠卷，真係唔好錯過呀！
係市集入面搵齊五個Oh… little sweet嘅角色印章就可以得到市集限定版口罩！
首個以「家庭」為主題的市集 家福會多元宣傳幸福秘訣
家福會一直以「以家為本」作為信念，提供多元嘅社會服務，而自2014年開始，家福會將每年五月份定為「家福月」，希望可以讓公眾認識重要嘅家庭價值。
「Homeland」家庭市集為今年家福月嘅重點活動之一，家福會希望透過今次市集讓大家了解喺香港不斷變化嘅情況底下，「家庭」呢個概念如何適應轉變，從中衍生咗多元嘅家庭，例如雙職家庭、多代家庭同寵物家庭等等，推動大家尋找屬於自己嘅「家庭幸福」。
今個月21及22號就同屋企人去中環PMQ元創坊過一個快樂嘅週末啦！
【家福會 X 白紙市集 X Oh...little sweet - 「Homeland」家庭市集】
日期 : 2022年5月21-22日 (星期六至日)
時間 : 11:00am - 7:00pm
地點 : 中環PMQ元創坊 (地下Courtyard & Marketplace 及 二樓The QUBE)
