2016-07-06

15.5K

【親子旅遊】太子站後花園 大坑東遊樂場

kim_1

連續幾個星期落雨濕濕,今日下晝終於停兩有少少太陽,即刻落去大坑東遊樂場打個轉先!

 

相信一家大細常常希望同小朋友來個草地短線遊!但係一諗起草地就只係想到迪欣湖、佐敦谷等等,最後覺得太遠就放棄咗!其實你又知唔知喺巿區都有好多綠色好去處!

今日我哋嚟到大坑東遊樂場,其實離太子港鐵站只係10分鐘路程!裡面有大草地,小食亭,洗手間及兒童遊樂設施好齊全好方便!

 

kim_feature

 

我哋由屋企慢慢行穿過警察遊樂會去到界限街入口!

球場旁邊公園有兩行大樹好遮蔭!!

 

kim_3

 

我哋由3號足球場入去大草地!

 

成個大坑東遊樂場由三個足球場,跑步徑(不同大小)同一個欖球場組成

 

kim_4

 

足球場旁邊有幾個鐵籠放咗喺度,原來只要自己帶個鎖嚟就可以將自己包包放入去鐵籠度!

 

kim_5

 

哥哥拎出自己既搖控車出嚟玩!不過始終個地下都濕濕地,唔係行得太順利!

 

kim_6

 

玩咗一陣我哋過去小食亭度抖一抖!順便俾哥哥有個平地去玩搖控車

 

呢間小食亭都非常齊全咩都有,同埋價錢都唔貴!老闆係伯伯婆婆夫妻檔睇舖,好親切好友。善!

 

西瓜波番皂泡一定唔少得啦!呢款咁懷舊既士多仔真係買少見少

 

kim_7

 

 

小食亭對出都有幾張枱櫈放喺度,自己製造一個高檔High Tea環境,聽吓雀仔唱歌,吹吓涼風!食番隻雞脾嘆番罐可樂,真係人生樂事!

 

High 完 Tea太陽出嚟,我哋就再落草地玩!

 

kim_8

 

成個球場都冇人,任踢入射唔嬲!YEAH

 

kim_9

 

其實呢個球場地方好大,就算球場範圍外都有好多草地,所以其實一家大細都可以落到嚟舖張墊喺草地上野食!

 

不過有點可惜,呢度唔俾踩Roller,單車,玩搖控飛機(搖控車冇問題),同埋唔準帶狗仔嚟!

 

場內兩側都有好多小木櫈同靚靚樹木!人又唔多,去又方便,真係一個幾唔錯既野餐地方

 

kim_10

 

始終地勢唔高,所以都唔俾放風箏!何況風都唔會夠大啦

近界限街同大坑東道交界有一座建築物,整座都被藤樹包圍住,感覺好似去咗天空之城咁!

 

kim_11

 

行出馬路睇吓佢正面,原來係個蓄洪池!

踢完波放吓飛機,喺大坑東遊樂場就燒咗2個鐘時間又俾佢放到電喇

 

kim_12

Photo by CANON 5D Mark III,Len | EF 24-70mm f2.8L USM

 

呀劍評分: 9

呀劍評語: 其實好多大草地就在你附近,只係大家冇留意未發覺啫!

大坑東遊樂場 簡介
1條480米長的緩跑徑,1足球場,1欖球場,小食亭,洗手間及更衣室

 

地址
九龍深水埗界限街 63 號

 

交通
太子 地鐵站從 A 出口離開
→經 運動場道 (途經 "嘉康中心"),轉左至 通菜街
→ 經 通菜街 ( 途經 Shell 油站 ),於 界限街 行人輔助線 過馬路後 轉右
→ 沿 界限街 至 大坑東遊樂場 南面入口

石硤尾 地鐵站從 B1 出口離開
→沿 窩仔街 (途經 "萬寧" 石硤尾分店),轉右至 棠蔭街
→沿 棠蔭街 直行 (途經 "聖道中學"),於轉處 到達 大坑東遊樂場 北面入口

 

開放時間
每日上午7時至下午6時

 

電話
2777 8946

 

(以上資料更新至文章當日)

 

【編按:以上內容為作者之個人意見及立場】

相關文章

【親子好去處】全港首個KAKAO FRIENDS主題Staycation 好玩好食兼打卡able!

【周末好去處】宣明會60周年展覽 免費製作小手工

【親子好去處】新城市廣場PLAYcation!全新兩層6萬呎娛樂體驗專區「Play Park 」

【親子好物】與小朋友歡聚必備!Häagen-Dazs™推四款迪士尼主題雪糕蛋糕

緊貼新冠肺炎最新相關資訊