講下講下和牛B就已經係一個三歲嘅人仔嚟，好有主見，好有性格。
仲記得和牛B第一年生日嘅時候，作為新手父母嘅我同牛爸。
見到和牛B身邊朋友都會出去租場搞Party，自己二話不說都出去租場地邀請朋友嚟玩。
當時整個生日Party、包括場地租用、食物、小禮物、佈置等，總共花費了五千多元。
諗返轉頭其實BB一歲係好開心嘅，不過開個咁大嘅Party其實得大人記得o架咋。
到和牛B兩歲嘅時候，我哋今次無再大搞了，只係約齊和牛B嘅好朋友上嚟屋企到玩。
屋企加少少生日主題同Peppa Pig嘅汽球，嘅生日大食會。
其實都好足夠了，因為佢都好開心。
兩歲嘅時候和牛B已經開始鍾意Peppa Pig了，上次呢個款嘅蛋糕，我哋足足食咗三次!
今年和牛B三歲，佢仍然係超愛Peppa Pig。幾個月前其實我就已經計劃梗要整一個Peppa Pig蛋糕俾佢，糖皮蛋糕原先係我最想做嘅款式，但係我雙手對糖皮敏感，而且難度同時間相對都要花得比較多。重點係我想俾個驚喜和牛B，所以要秘密進行。
最後，我諗咗一個最簡單嘅方法去做。
先製作一個海綿忌簾蛋糕上面，再灑大量朱古力碎，再配合下面嘅主角Peppa就完成了。
我上網買咗個Peppa Pig嘅半立體冰條模返嚟，再喺蛋糕烘焙店買咗粉紅色嘅朱古力返嚟，整溶朱古力倒入模具入面，雪返硬身再加返裝飾就完成。
朱古力Peppa我分咗兩晚去做，蛋糕早一晚焗，第二晚收工後即刻趕返去整Cream。
整好曬成個蛋糕先再接返和牛B，所以佢完全唔知道我為佢整蛋糕。
其實我覺得蛋糕做得唔係好靚，因為趕功課好心急嘅心情去做。
因為唔想太夜先接和牛B，所以超焦急。
到和牛B見到個蛋糕之後，佢真係超開心!
一直都望住個蛋糕咪咪咀笑，好開心笑得好甜。
到佢見到自己份生日禮物嘅時候，佢終於都忍唔住大笑咗出嚟。
睇返過去兩年，我覺得第一年咁高消費其實和牛B都享受唔到。
又或者當年佢太細個未識，但我相信就算而家我出去租個場地去玩，佢都未必好深刻記得呢件事。
反而，我花啲心思去做一個佢鍾意嘅"Peppa"蛋糕佢仲開心，會有更加深嘅印象。
