2022-01-28

1.1K

【農曆新年】新年前來個輕裝修!女人仔都可以一手攪掂

好快年廿八除左大掃除,我就襯新年前幫屋企來個輕裝修,一講到裝修好多人以為好難,但其實好似我一個女人仔都攪得掂,就知唔會真係好難啦,只要願意踏出第一步你就發現原來其實好簡單...仲幾好玩添,簡單幫屋企化下妝,女人仔都可以一手攪掂呢!! ^^

首先,有小朋友都會明白屋企啲牆係好難會長時間白雪雪,但只要帶好個口罩,到五金鋪買一啲髹油工具,例如:油掃,砂紙等,首先可先用砂紙打磨一遍,然後再塗乳膠漆。不過唔想煩純粹想遮醜,只要調製好乳膠漆直接油上即可,調製乳膠漆時提提大家記得要按照一定的比例,將水和乳膠漆適堂咁調配,如果水太多,太稀油漆就會唔上色,太結身會塗到一舊舊,切記薄薄一層層咁塗,每次塗完一層後,都需要等佢完全乾透後再上第2層,塗3-4層效果就最好。

如果油油太復雜其實坊間都有一啲清潔牆壁污垢或補色修補等的用品,但呢啲產品大部份都只有純白色,如果牆身係其他顏色就難處理啲了。

另外廚房或者廁所的地下瓷磚缝如果灰灰舊舊的,都好影響整體外觀感覺,但原來要翻新其實好容易,一枝美缝筆就可以改色,我在淘X買左2枝白色,好似畫畫咁直接畫上就OK,沿住缝位填上即可,枝筆主要可以防水防霉,抺左後就算抺地都無事,廚房填左缝後,成個感覺即刻乾淨晒 ^^

我衣櫃當初無造到上天花板,所以每年都要清潔櫃頂的灰塵,今年我決定使用填缝膠封左佢,一了百了...哈!!! 大大枝填缝膠五金店都係 $30有找,不過用起上黎就要用D力,同埋有少少技巧,有用具可以幫手,但事實係吱完後直接用手指掃返平滑係最靚仔,當然要快手同要盡快洗手。其實填缝膠用途好多,我除左封左櫃頂邊,仲填埋座廁邊沿及門邊位置,超好用 ^^

另外浴室或洗手盤防水膠邊好容易有呢D霉菌,膠邊變得又黃又起晒黑色點點,真係好肉酸,我淘左幾枝去霉啫哩,訓覺前吱落發霉位置,8個鐘起身後只要用濕紙巾一抺,黑點無晒,超方便!! 除左淘X市面上都有不同的去霉產品,不過聽我媽媽講好似話用廚房紙浸漂白水都有同樣效果,我無試過,大家可以試試話我知係咪真係WORK? ^^

最後淘開家品的話我亦有另一東西好介紹,將舊舊的SOFA同殘殘的書枱變身,只要度啱SIZE,SOFA原本有少少甩皮但放一張仿皮墊上去遮住,哈~ 又好似新的一樣!! 同樣書枱放一張厚厚的枱墊,小朋友做勞作或者做功課都唔怕再整污糟枱面啦 ^^

辛苦左一星期,我一個女人仔都可以輕裝修屋企,襯新年有個借口整靚少少個安樂窩,見到大小周董、一家人住得舒服又開心,一切都值得呢,係度預祝大家新年快樂,身體健康,最緊要疫情快啲BYEBYE ... 大家都可以盡快去到旅行啊 !!!

FB: 小周董世界
IG: 1437rita

【編按:以上內容為作者之個人意見及立場】

相關文章

【農曆新年】不可以食粥、午睡?10大農曆新年傳統禁忌(內含新年禁說)

【居家玩樂】自家製年宵市場 茶兄妹做老闆 親自下廚煮麵賣到無停手

綠色年宵迎新歲

派錯利是好尷尬?5項派利是須知

緊貼新冠肺炎最新相關資訊